कांग्रेस सांसद डा. सुनिल शर्मालाई साधारण तारेखमा राखेर अनुसन्धान अगाडि बढाउन अदालतले आदेश दिएको छ ।

काठमाडौं जिल्ला अदालतले शुक्रवार सांसद शर्मालाई थुनामुक्त गर्न आदेश दिएकाे हाे ।

न्यायाधीश दण्डपाणी शर्माको इजलासले सांसद शर्मालाई तारेखमा राखेर अनुसन्धान गर्न आदेश दिएको हाे ।

‘तारेखमा राखेर अनुसन्धान प्रक्रिया अगाडि बढाउन आदेश भएको छ’ काठमाडौं जिल्ला अदालतका सूचना अधिकारी दीपक दाहालले लोकान्तरसँग भने ।

प्रहरीको केन्द्रीय अनुसन्धान ब्यूरो (सीआइबी)ले सांसद शर्मालाई बिहीवार काठमाडौंको गोल्फुटारस्थित निवासबाट पक्राउ गरेको थियो । म्याद थपका लागि अदालत लगिएकोमा न्यायाधीशले थुनामुक्त गर्न आदेश दिएका हुन् ।

जिल्ला सरकारी वकिलको कार्यालय काठमाडौंले लिखत किर्ते मुद्दामा प्रहरी हिरासतमा राखी अनुसन्धान गर्न ७ दिनकाे म्याद थपका लागि अदालतमा शर्मालाई उपस्थित गराएकाे थियाे ।

तर अदालतले उनलाई हिरासतमा नराखी साधारण तारेखमा राखेर अनुसन्धान अगाडि बढाउन आदेश गरेकाे हाे । 

एमबीबीएस अध्ययनका लागि आइएस्सीको नक्कली शैक्षिक प्रमाणपत्र बनाएको कसुरमा शर्मालाई पक्राउ गरिएको थियो । शर्मासँगै नक्कली प्रमाणपत्र बनाएर एमबीबीएस पढेका अन्य ७ जना डाक्टरलाई पनि सीआईबीले नियन्त्रणमा लिएको थियो ।