वैशाखमा प्रदर्शनमा आएको दयाहाङ राई र मिरुना मगरको फिल्म ‘जारी’यताका नेपाली फिल्महरूले अपेक्षित दर्शक तान्न सकिरहेका छैनन् । सरोज खनालको निर्देशन रहेको ‘बगान’ले केही सुखद् व्यापार गरेपनि अन्य सबै नेपाली फिल्महरु बक्स अफिसमा चिप्लिन पुगे । 

गत शुक्रवारबाट प्रदर्शनमा आएका दुई फिल्म ‘जय हो’ र ‘महानगर’को व्यापार पनि सुखद् छैन । अब, धेरैको ध्यान आगामी फिल्महरूमा सोझिएको छ । 

आउँदो बिहीवार (भदौ १४)बाट दुई नेपाली फिल्महरू एकसाथ प्रदर्शनमा आउँदैछन् । 

स्वस्तिमा खड्का, वर्षा राउत, मुकुन भुषाल, सुशील सिटौला लगायतको अभिनय रहेको ‘ऐंचो पैंचो’ एकातर्फ छ भने अर्कोतर्फ मुकुन भुषाल, मेनुका प्रधान, प्रकाश घिमिरे, सूर्यमाला शर्मा, राजाराम पौडेल, देवेन्द्र बब्लु लगायतको अभिनय रहेको ‘गणपति’ प्रदर्शन हुँदैछ । 

कृषा चौलागाईंले निर्देशन गरेको ‘ऐंचो पैंचो’ सामाजिक विषयमा बनेको फिल्म हो । राजनीतिले समाजमा पारेको प्रभावको कथा फिल्मले पेस गर्ने निर्माण टिमले जनाएको छ । यता, सविन अधिकारीको निर्देशनमा बनेको ‘गणपति’ भगवानको रुपमा जन्मिएको व्यक्तिको कथामा निर्माण गरिएको छ । यसपछिको हप्ता भने नेपाली फिल्म प्रदर्शनमा आउने छैनन् । 

बलिउड अभिनेता साहरूख खान अभिनीत प्रतीक्षित फिल्म ‘जवान’ प्रदर्शनमा आउने भएका कारण आगामी साताका लागि नेपाली फिल्मले प्रदर्शन मिति तोक्न डराएका हुन् । त्यसपछि भदौ २९ मा भने दुईवटा नेपाली फिल्म एकसाथ प्रदर्शनमा आउनेछन् । 

दीपेन्द्र लामाको लेखन एवं निर्देशनमा बनेको ‘नाङ्गो गाउँ’ र झरना थापाको निर्देशनमा बनेको ‘एक भगवत् गीता’ तीजको अवसर पारेर भदौको अन्तिम शुक्रवारबाट प्रदर्शनमा आउने भएका हुन् । 

राजनीतिक कथामा बनेको ‘नाङ्गो गाउँ’मा दयाहाङ राई, शिशिर वाङ्देल, मिरुना मगर, कार्म, साम्राज्ञी राज्यलक्ष्मी शाह, बुद्धि तामाङलगायतको अभिनय छ । 

त्यस्तै, सामाजिक कथामा बनेको ‘एक भगवत गीता’मा विपिन कार्की, सुहाना थापा, धिरज मगर, कविर खड्का लगायतका कलाकारहरूको अभिनय छ । यो फिल्ममा अभिनेता विपिन लैङ्गिक अल्पसंख्यकको पात्र कमलामाईको अवतारमा प्रस्तुत छन् । 

भदौमा आगामी दिनमा रिलिज हुने फिल्महरू अलगअलग स्वादका छन् । ती फिल्मलाई लिएर फिल्मकर्मीसँगै दर्शकले पनि अपेक्षा राखेका छन् । पछिल्लो समय सुस्ताएको नेपाली फिल्मको बक्स अफिस अब चलायमान हुने अपेक्षा गरिएको छ ।