गण्डकीमा ओली समूहलाई पृथ्वीसुब्बाको टक्कर, माओवादी सचिव खतरामुक्त

‘लोकान्तर राउण्ड अप’मा पाठकवृन्दलाई स्वागत छ । सधैँझैँ आज पनि हामी बितेको २४ घण्टाका मुख्यमुख्य घटनाक्रमसहित उपस्थित भएका छौँ–
सुदूरपश्चिम प्रदेश सरकारले भूकम्पबाट प्रभावित भई घाइते भएकाको उपचार खर्च व्यहोर्ने भएको छ । मुख्यमन्त्री तथा मन्त्रिपरिषद्को कार्यालय धनगढीमा बुधबार बसेको सर्वपक्षीय बैठकमा भूकम्पबाट प्रभावितको उद्धार कार्यलाई प्रभावकारी बनाउँदै प्रभावितलाई तत्काल एकद्वार प्रणालीबाट राहत सामग्री वितरण गर्ने निर्णय भएको छ ।
००००
नेकपा माओवादी केन्द्रका अध्यक्ष तथा प्रधानमन्त्री पुष्पकमल दाहाल ‘प्रचण्ड’ले मिलेनियम च्यालेन्ज कर्पोरेशन (एमसीसी) परियोजनाले नेपाल र अमेरिकाबीच आर्थिक साझेदारीको नयाँ ढोका खुलेको धारणा राखेका छन् ।   

नेपाल सरकारको लगानी तथा एमसीसीको अनुदान रहेको एमसीसी नेपाल कम्प्याक्ट कार्यान्वयन चरणमा प्रवेश गरेको अवसरमा  बुधबार राजधानीमा एमसिए–नेपालद्वारा आयोजित विशेष समारोहलाई सम्बोधन गर्दै प्रधानमन्त्रीले यस्तो बताएका हुन् ।
००००
लुम्बिनी, बागमती, कर्णाली र कोशीपछि गण्डकीमा पनि केन्द्रीय अध्यक्ष केपी शर्मा ओली समूहलाई टक्कर दिन एमालेको अर्को समूह चुनावी मैदानमा उत्रिएको छ ।

अध्यक्ष ओलीले सकेसम्म आफैंले भनेका उम्मेदवारलाई सर्वसम्मत बनाउने, नभए आफू निकटलाई जिताउने अडान लिएपछि गण्डकी एमालेमा उपमहासचिव पृथ्वीसुब्बा गुरुङले पदाधिकारीमा उम्मेदवार अघि सारेका हुन् ।
बन्दसत्र सकिएपछि पनि सहमतिको नाममा दुई दिनको समय लम्बियो । अन्ततः अरू प्रदेशमा जस्तै गण्डकीमा पनि प्यानलगत प्रतिस्पर्धा पक्का भएको हो । 

सहमति सम्भव नभएपछि अहिलेसम्म भएका चार प्रदेशको नेतृत्वमा ओली समूहबाट कोशी र बागमती तथा अर्को समूहबाट लुम्बिनी र कर्णालीमा नेतृत्व चुनिएको छ ।

खासगरी गण्डकी एमालेमा उपमहासचिव पृथ्वीसुब्बा गुरुङ र स्थायी कमिटी सदस्य खगराज अधिकारी परम्परागत प्रतिस्पर्धी हुन् । यी दुवै सहमतिमा आउन तयार नभएपछि पदाधिकारीमा समूहगत प्रतिस्पर्धा पक्का भएको हो । 

सहमतिको प्रयास सफल नभएपछि आआफ्नो ढंगले अगाडि बढ्ने तयारी भएको उपमहासचिव गुरुङले बताए । अध्यक्ष पदका लागि नवराज शर्मा र मायानाथ अधिकारीले उम्मेदवारी दर्ता गरेका छन् । शर्मालाई गुरुङ र अधिकारीलाई खगराजको साथ छ । 
००००
जल तथा मौसम विज्ञान विभागले बिहीबारदेखि मौसम क्रमिकरूपमा सुधार हुँदै जाने जानकारी गराएको छ । 
विभागका मौसमविद् गोविन्द झाका अनुसार नेपालको पूर्वी क्षेत्रमा केही बदली बाँकी नै रहने र अन्य क्षेत्रबाट क्रमिक सुधार हुँदै जाने छ ।
००००
काठमाडौँ उपत्यका प्रहरी कार्यालयले चाडपर्वमा हुनसक्ने अवाञ्चित गतिविधि, कालोबजारी, यातायात क्षेत्रमा हुने ठगीलगायत आपराधिक गतिविधि हुन नदिन विशेष निगरानीका लागि तीनै जिल्लाका प्रहरी र मातहतका युनिटलाई सर्कुलर जारी गरेको छ । 

काठमाडौँ, ललितपुर र भक्तपुरको सुरक्षा व्यवस्था मजबुद बनाउन आवश्यक सुरक्षा योजना निर्माणमा जुटेको उपत्यका प्रहरीले तीनै जिल्ला र मातहतका युनिटलाई विशेष चनाखोका साथ प्रहरी सेवा प्रावाह गर्न सर्कुलर जारी गरेको कार्यालयका प्रमुख, प्रहरी अतिरिक्त महानिरीक्षक दीपक थापाले जानकारी दिए ।
००००
प्रधानमन्त्री पुष्पकमल दाहाल ‘प्रचण्ड’ले मङ्गलबार बझाङ केन्द्रबिन्दु भएर गएको भूकम्प, त्यसबाट भएको क्षति र सरकारको कार्ययोजनाबारे छलफल गर्न राष्ट्रिय विपद् जोखिम न्यूनीकरण तथा व्यवस्थापन प्राधिकरणको बैठक बोलाएका छन् ।
००००
कोशी प्रदेशको प्रदेशसभाको बैठकमा प्रदेश सरकारको अर्थसम्बन्धी प्रस्तावलाई कार्यान्वयन गर्न बनेको अध्यादेश र आर्थिक वर्ष २०८०–८१ को सेवा र कार्यका लागि प्रदेश सञ्चित कोषबाट केही रकम विनियोजन र खर्च गर्ने सम्बन्धमा व्यवस्था गर्न बनेको अध्यादेश पेस भएको छ । 
प्रदेश सरकारका आन्तरिक मामिला तथा कानुनमन्त्री लीलावल्लभ अधिकारीले ती अध्यादेश प्रदेशसभामा पेश गरेका हुन् ।
००००
उद्योग तथा वाणिज्य र श्रम तथा उपभोक्ता हित समितिका सभापति अब्दुल खांनले सुपारी व्यवसायको समग्र अवस्थाबारे सरोकारवालासँग जानकारी लिने र अध्ययन गर्ने बताएका छन् । 

समितिको बुधबार बसेको बैठकमा सभापति खांनले सुपारी निर्यातमा समस्या देखिएको सम्बन्धमा समितिले आवश्यक अध्ययन गरी सम्बन्धित निकायलाई आवश्यक निर्देशन दिइने बताए ।
००००
राष्ट्रिय सुरक्षा परिषद्को बैठक बुधबार बसेको छ । बैठकमा वर्तमान अन्तर्राष्ट्रिय, क्षेत्रीय र राष्ट्रिय सुरक्षा वातावरण सम्बन्धी समीक्षा भएको जनाइएको छ । 

प्रधानमन्त्री प्रचण्डको अध्यक्षतामा सिंहदरबारस्थित राष्ट्रिय सुरक्षा परिषद्को सचिवालयमा सम्पन्न बैठकमा पछिल्ला केही दिनहरुमा देशका केही स्थानहरुमा धार्मिक, साम्प्रदायिक असहिष्णुता बढाउने गरी भएका गतिविधिहरुबारे छलफल भएको छ ।
००००
भौतिक पूर्वाधार तथा यातायात व्यवस्थामन्त्री प्रकाश ज्वालाले सार्वजनिक यातायातलाई सहज बनाइने बताएका छन् । दशैं, तिहार र छठ पर्वको समयमा बढी आवतजावत हुने भएकाले सो समयमा सार्वजनिक यातायातलाई सहज बनाउने उनले बताए । 

प्रतिनिधिसभा अन्तर्गतको यातायात पूर्वाधार विकास समितिको आजको बैठकमा मन्त्री ज्वालाले सीमित स्रोतका बाबजुद पनि चाडबाडमा सार्वजनिक यातायात यात्रुमैत्री बनाउन सरकारले विशेष ध्यान दिने बताए ।
००००
सरकारले स्वास्थ्य तथा जनसंख्या मन्त्रालय अन्तर्गतमा १७२ अधिकृत स्तरका दरबन्दी स्वीकृत गरेको छ ।
मन्त्रिपरिषद् बैठकको निर्णय सार्वजनिक गर्दै सरकारकी प्रवक्ता रेखा शर्माले मन्त्रालय अन्तर्गत १७२ अधिकृतस्तरका दरबन्दी स्वीकृत भएको जानकारी दिएकी हुन् ।
००००
एसीसी यू–१९ प्रिमियर कपका लागि नेपाली टोली घोषणा भएको छ । नेपाल क्रिकेट संघ क्यानले देव खनालको नेतृत्वमा बुधवार १८ सदस्यीय टोली घोषणा गरेको हो ।
००००
दोलखामा बरामद भएको ११ किलो सुन प्रकरणमा थप एक जना चिनियाँ नागरिक पक्राउ परेका छन् । पक्राउ पर्नेमा तासी दावा भन्ने ६६ वर्षीय आगर लामा रहेका छन् ।

नेपालमा सुन ल्याउन भूमिका खेलेको आरोपमा उनलाई स्वयम्भूबाट पक्राउ गरिएको नेपाल प्रहरीको केन्द्रीय अनुसन्धान ब्यूरोले जनाएको छ ।
००००
बाँकेको नेपालगञ्ज उपमहानगरपालिका क्षेत्रमा मंगलवार दिउँसो १ बजेदेखि जारी भएको निषेधाज्ञा यथावत् रहेको छ । तर, केही खुकुलो भने बनाइएके छ । 

जिल्ला प्रशासन कार्यालय, बाँकेका प्रशासकीय अधिकृत विष्णु शाहनीले आज जारी गरेको विज्ञप्तिमा निषेधाज्ञाका क्रममा भएको झडपमा पाँच सुरक्षाकर्मी र १७ सर्वसाधरणसहित २२ जना घाइते भएका तथा उनीहरूमध्ये २१ जना उपचारपछि घर फर्केका र एक जनाको भेरी अस्पतालमा उपचार भइरहेको उल्लेख छ ।
००००
आफ्ना श्रीमानको हत्या गर्ने योगराज ढकाल (रिगल)ले राष्ट्रपतिबाट कैद माफी मिनाहा पाएपछि अनसन थालेकी भारती मानन्धर सर्वोच्च अदालत परिसरमै ढलेकी छन् । 

कैद माफीको निर्णयविरुद्ध आफैंले दायर गरेको रिटमा तारेख धान्न सर्वोच्च पुगेकी भारती सर्वोच्च परिसरमै ढलेकी हुन् । उनलाई प्रहरीले वीर अस्पताल र्पुयाएका छन् ।
००००
भौतिक पूर्वाधार तथा यातायात मन्त्री प्रकाश ज्वालाले राजधानीका मुख्य सडकको खाल्डाखुल्डी दशैंअगावै पुरिसक्ने बताएका छन् ।
प्रतिनिधिसभाअन्तर्गत पूर्वाधार विकास समितिको बैठकमा बुधवार बोल्दै मन्त्री आफ्नो मन्त्रालयअन्तर्गत पर्ने सडकको खाल्डाखुल्डी दशैंअगाडि नै पुर्ने बताएका हुन् ।
००००
नेकपा एमालेका अध्यक्ष केपी शर्मा ओलीले देशमा नेपाली कांग्रेसको बोल्ने हविगत नै नभएको बताएका छन् । बुधवार विराटनगर विमानस्थलमा सञ्चारकर्मीसँगको कुराकानीमा ओलीले सत्तारुढ दल कांग्रेसलाई ‘बिचरा’को संज्ञा दिँदै यस्तो बताएका हुन् । 
००००
पक्षघातका भएका माओवादी केन्द्रका केन्द्रीय सचिव एवं सुदूरपश्चिम इन्चार्ज डिलाराम आचार्यको स्वास्थ्य अवस्था खतरामुक्त रहेको चिकित्सकले जानकारी दिएका छन् ।  आचार्यको वीर अस्पतालमा उपचार भइरहेको छ ।

उनमा  मुटुसम्बन्धी पुरानो समस्या भएकाले न्युरो र मुटुसम्बन्धी एकसाथ उपचार भइरहेको कार्यकारी निर्देशक सन्तोष पौडेलले जानकारी दिए ।
अछाम पुगेका उनमा स्वास्थ्य समस्या भएपछि बुधबार नेपालगन्ज हुँदै काठमाडौँ ल्याइएको थियो ।