दुर्गा प्रसाईंमाथि युवासंघको कालोसोमोदेखि महेश बस्नेतको चेतावनीसम्म

‘लोकान्तर राउण्ड अप’मा पाठकवृन्दलाई स्वागत छ । सधैँझैँ आज पनि हामी बितेका २४ घण्टाका मुख्यमुख्य घटनाक्रमसहित उपस्थित भएका छौँ–
सरकारले मंगलबार राष्ट्रिय शोक घोषणा गरेको छ । इजरायलमा हमास समूहको आक्रमणमा परी १० नेपालीको निधन भएकोमा सरकारले आज राष्ट्रिय शोक घोषणा गरेको हो । 

आज देशभरका सरकारी कार्यालयहरूमा र विदेशस्थित नियोगमा झण्डा आधा झुकाइने छ । यस्तै मन्त्रिपरिषद् बैठकले मृतक नेपालीका परिवारलाई राहतस्वरुप १० लाख रुपैयाँ दिने र समस्यामा परेकाहरुको उद्धार गर्ने निर्णय पनि गरेको छ ।
००००
तेल अबिबस्थित नेपाली राजदूतावासले हमासको आक्रमणमा मारिएका १० जना नेपालीको शव नेपाल पठाउन इजरायल सरकार र सम्बन्धित निकायसँग समन्वय एवं सहकार्य थालेको बताएको छ । 

घाइते भएका चारजनाको स्थानीय अस्पतालमा उपचार भइरहेको तथा दुईजनालाई तेल अबिबमा सुरक्षित राखिएको छ । दूतावासले जारी गरेको विज्ञप्तिअनुसार प्रहरी, अस्पताललगायत उपलब्ध स्थानीय संयन्त्रको सहयोगमा सम्पर्कविहीन भएका एकजना नेपालीको खोजीलाई तीव्र गतिमा अघि बढाइएको जनाएको छ ।
००००
गृह मन्त्रालयले इजरायल घटनासँग सम्बन्धित विषयमा सोमबार बसेको मन्त्रिपरिषद् बैठकले गरेको निर्णय कार्यान्वयन हुने प्रक्रियामा अघि बढिसकेको जनाएको छ । 

घटनामा निधन भएका नेपालीहरुको शव यथाशीघ्र स्वदेश ल्याउने, निधन भएका नेपालीहरुको परिवारलाई राहत उपलब्ध गराउने, वेपत्ता भएका नेपालीको खोजीलाई तीव्रता दिने, फर्कन चाहने नेपालीहरुलाई यथाशीघ्र नेपाल एयरलाइन्स र हिमालय एयरलाइन्सको विमान चार्टर्ड गरी नेपाल ल्याउन प्रबन्ध गर्ने लगायतका मन्त्रिपरिषद्का निर्णयहरु सम्बन्धित मन्त्रालयहरुबाट कार्यान्वयन हुने प्रक्रिया अगाडि बढिसकेको प्रवक्ता नारायण प्रसाद भट्टराईले जारी गरेको विज्ञप्तिमा उल्लेख छ ।
००००
संसद्मा प्रतिनिधित्व गर्ने प्रमुख दलहरूले इजरायलमा भएको घटनापछि उत्पन्न परिस्थितिको मिलेर सामना गर्ने सहमति गरेका छन् । 
सत्ताको नेतृत्व गरिरहेको दल नेकपा (माओवादी केन्द्र)का नेता हितराज पाण्डेले बैठकपछि यसको जानकारी दिएका हुन् ।
००००
भारतको सिक्किममा  १० जना नेपाली बेपत्ता भएका छन् ।  उनीहरू सबै इलाम नगरपालिका–९ का रहेको बताइएको छ । 
यही असोज १६ देखि उनीहरू बेपत्ता भएका हुन् ।
००००
चीनको सिशापाङ्मा हिमाल आरोहणका क्रममा गएको हिमपहिरोमा विश्व कीर्तिमानी आरोही तथा पथप्रदर्शक तेञ्जेन शेर्पा बेपत्ता भएका छन् ।
विश्वका १४ अग्ला हिमालमध्ये चीनको तिब्बतमा रहेको १४औँ अग्लो सिशापाङ्मा हिमालमा गत शनिबार गएको हिमपहिरोमा उनीसँगै अमेरिकी नागरिक गिना मारी रुजकिल्डो पनि बेपत्ता भएको संस्कृति, पर्यटन तथा नागरिक उड्डयन मन्त्रालयले जनाएको छ ।
००००
काठमाडौँ महानगरपालिकाले नगरवासीलाई निःशुल्क रगत उपलब्ध गराउन नेपाल रेडक्रस सोसाइटीसँग सम्झौता गरेको छ ।
काठमाडौँ महानगरपालिकाका प्रमुख बालेन्द्र साह र उपप्रमुख सुनिता डङ्गोलको रोहवरमा  कामपाका तर्फबाट स्वास्थ्य विभाग प्रमुख रामप्रसाद पौडेल र नेपाल रेडक्रस सोसाइटीका तर्फबाट उपमहामन्त्री मनोजकुमार थापाले सो सम्झौता पत्रमा हस्ताक्षर गरे ।
००००
कर्णाली प्रदेश निजामती सेवा गठन, सञ्चालन र सेवा सर्त सम्बन्धमा व्यवस्था गर्न बनेको विधेयक’ सर्वसम्मतिले पारित भएको छ ।
कर्णाली प्रदेशसभाको सोमबारको बैठकले उक्त विधेयक सर्वसम्मतिले पारित गरेको हो । बैठकमा आन्तरिक मामिला तथा कानुनमन्त्री कृष्णबहादुर जिसीले विधेयक प्रस्तुत गरेका थिए ।
००००
व्यवसायी दुर्गा प्रसाईंलाई युवासंघले कालोमोसो दलेको छ ।

सोमवार दिउँसो एल्लो पगोडा होटलमा पत्रकार सम्मेलनका लागि पुगेका प्रसाईंमाथि कालोमोसो दलिएको हो । युवासंघका अध्यक्ष क्षितिज थेवेले प्रसाईंलाई कालोमोसो दल्न युवा संघको संलग्नता रहेको स्वीकारे । प्रसाईले राज्य र संविधानलाई नै चुनौती दिने काम गरेको उनले बताए । 
००००
यसैगरी एमाले नेता महेश बस्नेतले प्रसाईंलाई युवासंघको तागत ननाप्त चेतावनी दिएका छन् । बैंक तथा वित्तीय संस्थालाई चुनौती दिने, विभिन्न समुदायलाई देश निकाल्छु , कालोमोसो दल्छु भन्ने प्रसाईलाई युवाहरुले तह लगाएको उनको भनाइ छ ।  ‘अब सुध्रिउ, अरुलाई दोष नलगाउ । यस्तालाई सरकारले कारवाही गरोस् । जनप्रतिरोध हुनु राम्रो होइन । युवा संघको तागत ननाप प्रसाई’, बस्नेतले सामाजिक सञ्जालमा भनेका छन् ।
००००
राष्ट्रपति रामचन्द्र पौडेलले इजरायलमा रहेका नेपाली नागरिकहरूको आवश्यकताअनुसार उद्धार, स्वदेश फिर्ती, मृतकका परिवारलाई राहत लगायतका विषयमा चासो व्यक्त गरेका छन् ।
राष्ट्रपति पौडेलले परराष्ट्रमन्त्री एनपी साउदलाई शीतल निवासमा बोलाएर इजरायलमा रहेका नेपाली नागरिकहरूको अवस्थाबारे चासो व्यक्त गरेका हुन् ।
००००
नेपाली कांग्रेसको महाधिवेशनपछिको सबैभन्दा शक्तिशाली निकाय महासमितिको बैठक आगामी मंसिर १३ देखि १५ सम्म काठमाडौंमा बस्दैछ । 
कांग्रेसमा महासमिति महाधिवेशनपछिको सबैभन्दा शक्तिशाली निकाय हो । कांग्रेसको विधानमा महासमिति बैठक महाधिवेशन हुने वर्ष बाहेक प्रत्येक वर्ष एकपटक बस्ने व्यवस्था छ । 
महासमितिले केन्द्रीय पदाधिकारी र सदस्यको निर्वाचनबाहेक महाधिवेशनले गर्ने सबै कार्य गर्नेछ । बैठकको लागि कांग्रेसले आवश्यक तयारी थालेको छ।  
००००
सरकारले चाडपर्वमा घर जाने यात्रुलाई लक्षित गरेर सोमबारदेखि अग्रिम टिकट बूकिङ खुला गरेको छ । सरकारले सङ्घीय राजधानी काठमाडौंबाट चाडपर्व मनाउन घर जानेलाई लक्षित गरेर आजदेखि अग्रिम टिकट बूकिङ खुला गरेको हो ।
००००
काठमाडौँ महानगरपालिकाभित्रका ३ वटा सडक खण्डमा एकतर्फी सवारी सञ्चालन गर्ने तयारी भएको छ । महानगरपालिकाका ट्राफिक विज्ञ सल्लाहकार जगतमान श्रेष्ठकाअनुसार अहिले दोहोरो सवारी सञ्चालन भइरहेका सडक खण्डलाई एकतर्फी बनाउन लागिएको हो । 
उनका अनुसार अब काठमाडौँ र ललितपुर जोड्ने सेतोपुल, गुसिङ्गाल, मिलन मार्ग हुँदै त्रिपुरेश्वर आउने सडकमा त्रिपुरेश्वरबाट प्रवेश गर्न पाइने छैन । 
त्यस्तै जमल र दरबारमार्गबाट रत्नपार्क आउँदा त्रिचन्द्र क्याम्पस अगाडिबाट बायाँ मोडेर गणेशस्थान, प्रज्ञाभवन हुँदै कमलादी मोडतर्फ आउन नपाइने बनाइएको छ ।
पुतली सडकबाट काठमाडौँ प्लाजा हुँदै हात्तीसारतर्फको सडक खण्डमा अब प्लाजाबाट बायाँ मोडिन पाइने छैन ।