कोशीमा कोइराला समूहको विद्रोहदेखि इजरायलबाट नेपालीको उद्धारसम्म

‘लोकान्तर राउण्ड अप’मा पाठकवृन्दलाई स्वागत छ । सधैँझैँ आज पनि हामी बितेका २४ घण्टाका मुख्यमुख्य घटनाक्रमसहित उपस्थित भएका छौँ–
इजरायलबाट २५४ जना नेपाली विद्यार्थीलाई उद्धार गरी शुक्रबार बिहान नेपाल ल्याइएको छ । उनीहरुलाई नेपाल एयरलाइन्सको वाइडवडी विमानबाट नेपाल ल्याइएको हो । नेपालीको उद्धारका लागि परराष्ट्रमन्त्री एनपी साउद आफैँ चार्टर विमानमा इजरायल पुगेका थिए । 
त्रिभुवन विमानस्थलमा अवतरणपछि विद्यार्थीहरुले स्वदेश फर्किन पाउँदा खुसी लागेको बताए । साथसाथै १० जना साथीहरु हमासको आक्रमणमा मारिँदा दुखित भएको पनि बताए ।
००००
कोशीको मुख्यमन्त्रीमा बिहीबार सत्ता गठबन्धनका तर्फबाट नेकपा माओवादी केन्द्रका इन्द्रबहादुर आङ्बोले दाबी पेश गरेका छन् ।
कांग्रेसका २९, माओवादीका १३, नेकपा एकीकृत समाजवादीका ४ र जनता पार्टीका १ गरी ४७ सांसदको हस्ताक्षरसहित आङ्बोले प्रदेश प्रमुख परशुराम खापुङसमक्ष दाबी पेश गरेका हुन् ।

तर, कांग्रेसबाट शेखर कोइराला समूहका ८ सांसदले विद्रोह गर्दै एमालेसँग मिलेर कांग्रेस सांसद केदार कार्कीले पनि मुख्यमन्त्रीमा दाबी पेश गरेका छन् । यससँगै कोशीको सत्ता गठबन्धन भत्किएको छ । यसअघि बिहीबार केन्द्रमा माओवादी केन्द्रका आङ्बोलाई मुख्यमन्त्री बनाउने सहमति भएपनि अन्तिम समयमा आएर भत्किएको हो ।
००००
कोशीमा विकसित घटनाक्रमका बीच नेपाली कांग्रेस कोशी प्रदेश संसदीय दलको उपनेता हिमाल कार्कीले राजीनामा दिएका छन् । प्रदेशसभा सदस्यको हैसियतमा काम गर्ने भन्दै कार्कीले उपनेता बिहीवार  राजीनामा दिएका हुन् ।
००००
कोशी प्रदेशमा डा शेखर कोइराला पक्षले ‘विद्रोह’ गरेपछि संस्थापन पक्षले कार्यसम्पादन समितिको बैठक बोलाएको छ । कोशी कांग्रेसले शुक्रवार आवश्यक निर्णयको लागि भन्दै कार्यसम्पादन समितिको बैठक बोलाएको हो ।
००००
प्रधानमन्त्री पुष्पकमल दाहाल ‘प्रचण्ड’ले शान्ति सम्झौताका सहयात्रीमा नै जनयुद्धको सन्दर्भ र शान्ति प्रक्रिया टुङ्ग्याउने विषयमा नकारात्मक प्रवृत्ति देखापरेको बताएका छन् ।  

द्वन्द्व पीडित परिवारका आफन्त तथा परिवारले ‘सङ्क्रमणकालीन न्याय प्रक्रियामा पीडित केन्द्रित दृष्टिकोण र समाधानको बाटो’ विषयक राष्ट्रिय परामर्श भेला गरी निकालेको निष्कर्ष पत्र प्रधानमन्त्री निवास बालुवाटारमा  बुझ्दै प्रधानमन्त्री दाहालले यस्तो बताएका हुन् ।
००००
राष्ट्रपति रामचन्द्र पौडेल सङ्घीय गणतन्त्र जर्मनीका राष्ट्रपतिको मैत्रीपूर्ण निमन्त्रणमा  आगामी महिना जर्मनीको भ्रमणमा जाने भएका छन् ।
००००
राष्ट्रपति रामचन्द्र पौडेलसँग पूर्व राष्ट्रपति डा रामवरण यादवले अहिले बन्द गरिएको गिटटी, ढुंगा, बालुवा उत्खनन गरी निकासी खुला गर्ने सम्बन्धी सरकारले हालै स्वीकृत गरेको विधेयकमा रहेका निकासीसम्बन्धी प्रावधानलाई हटाउने विषयमा ध्यानाकर्षण गराएका छन् ।
००००
नेपाल स्टक एक्सचेञ्ज (नेप्से) परिसूचक दोहोरो अङ्कले घटेको छ । २० दशमलव १६ अङ्कले घटेर नेप्से परिसूचक १ हजार ८ सय ७४ दशमलव ६० को विन्दुमा पुगेको छ ।
००००
काठमाडौंको बौद्धमा प्रहरीको गोली लागेर लुटेरा समूहका एक जना घाइते भएका छन् ।
गोकणेश्वर नगरपालिका–३ को जगडोलमा प्रहरीले चलाएको गोली लागेर सिन्धुली कमलामाई नगरपालिका–२ घर भएका ३६ वर्षीय अमर घलान घाइते भएका हुन् ।
००००
योगराज ढकाल रिगललाई आममाफी दिने राष्ट्रपतिको निर्णयविरुद्ध परेको रिटको टुंगो दशैंपछि मात्र लाग्ने भएको छ ।
सर्वोच्च अदालतमा बिहीवार भएको सुनुवाइ अर्को पेशी कात्तिक १४ गतेका लागि तोक्ने गरी सकिएको छ ।
००००
भारतीय प्रधानमन्त्री नरेन्द्र मोदीले नेपालको कालापानी क्षेत्र भ्रमण गरेकोबारे रास्वपा सभापति रवि लामिछानेले संसद्मा सरकारको जवाफ माग गरेका छन् ।
बिहीवार बसेको प्रतिनिधि सभा बैठकको आकस्मिक समयमा पूर्वगृहमन्त्री समेत रहेका लामिछानेले मोदीको भ्रमणबारे सदनमा सरकारको जवाफ माग गरेका हुन् ।
००००
राष्ट्रपति रामचन्द्र पौडेलले उपराष्ट्रपति रामसहायप्रसाद यादवको स्वास्थ्यलाभको कामना गरेका छन् ।
राष्ट्रपति पौडेलले डेङ्गु सङ्क्रमण भएपछि बानेश्वरस्थित सिभिल अस्पतालमा भर्ना भएका उपराष्ट्रपति यादवको स्वास्थ्यलाभको कामना गरेका हुन् ।