तीन टुक्रा भयो एनआरएनए, आरके शर्माको नेतृत्वमा नयाँ कमिटी घोषणा

‘लोकान्तर राउण्ड अप’मा पाठकवृन्दलाई स्वागत छ । सधैँझैँ आज पनि हामी बितेका २४ घण्टाका मुख्यमुख्य घटनाक्रमसहित उपस्थित भएका छौँ–
आरके शर्माको नेतृत्वमा कांग्रेस र माओवादी निकट गैरआवासीय नेपालीहरुले समानान्तर रुपमा नयाँ कमिटी घोषणा गरेसँगै गैरआवासीय नेपाली संघ (एनआरएनए) तीन टुक्रा बनेको छ । शनिबार बद्री केसीले विवादका बीच अध्यक्षको शपथ लिएसँगै असन्तुष्ट समूहले पनि आफूहरु नै आधिकारिक भएको दाबी गर्दै नयाँ कमिटी घोषणा गरेको हो । 

राजधानीको होटल हिमालयमा भेला भएका आरके पक्षले ११ औँ विश्व सम्मेलनको बाँकी प्रक्रिया पुरा गरेर कमिटी घोषणा गरेको हो । कमिटी घोषणापछि आरकेले आफू नेतृत्वको एनआरएनए नै आधिकारिक भएको भन्दै बद्री केसीको नेतृत्व अवैध भएको दाबी गरे । 

यसअघि नै १० औँ महाधिवेशनमा शेष घलेको योजनामा एनआरएनए फुटाइएको थियो । घले समूहबाट विनोद कुँवर अध्यक्ष रहेका छन् । 
यससँगै विनोद कुँवर, बद्री केसी र आरके शर्मा नेतृत्वमा एनआरएनए तीन टुक्रामा विभाजित बनेको छ । एनआरएनए पछिल्लो समय बदनाम र विवादको केन्द्रमा रहँदै आएको छ । 
००००
एनआरएनएको बद्री केसी नेतृत्वले शनिवारदेखि कार्यभार सम्हालेको छ । कार्यभार सम्हालेपछि केसीको अध्यक्षतामा पदाधिकारीको पहिलो बैठक भएको थियो । यद्यपि बैठकका निर्णय सार्वजनिक गरिएको छैन । ११ औँ महाधिवेशनबाटै एनआरएनए दुई वटा भएसँगै यसलाई सरकारले कुन नजरले हेर्छ भन्ने चासो बढेको छ । एनआरएनएको नयाँ कमिटीलाई परराष्ट्र मन्त्रालयले मान्यता दिनुपर्ने हुन्छ । 
००००
धादिङको खरी आसपास केन्द्रबिन्दु भएर ६.१ म्याग्निच्युडको भूकम्प गएको छ।  आइतबार बिहान ७ बजेर ३९ मिनेटमा भूकम्प गएको राष्ट्रिय भूकम्प मापन केन्द्रका प्रमुख लोकविजय अधिकारीले जानकारी दिए । 
००००
बडादशैँको आठौँ दिन आइतबार महाकाली, महालक्ष्मी र महासरस्वती देवीको विधिपूर्वक विशेष पूजा आराधना गरी देशभर महाअष्टमी पर्व मनाइँदै छ ।
यसअघि शनिबार फूलपाती मनाइएको थियो । यसैबीच राष्ट्रपति रामचन्द्र पौडेलको प्रमुख आतिथ्यमा सैनिक मञ्च टुँडिखेलमा शनिवार अपराह्न फूलपाती बढाइँ समारोह गरिएको छ ।
बडादशैँको सातौँ दिनको अवसर पारेर आयोजना गरिएको फूलपाती बढाइँ कार्यक्रममा सैनिक परेड प्रदर्शन गरिएको थियो ।
००००
प्यालेस्टाइनी संगठन हमासको आक्रमणबाट निधन भएका ४ जना नेपालीको शव आइतबार नेपाल ल्याइँदै छ । नेपाल ल्याइर्पुयाइने चार शव नारायणप्रसाद न्यौपाने, लोकेन्द्रसिंह धामी, दिपेशराज बिष्ट र आशिष चौधरीका रहेका छन् ।
००००
नेपाल वायु सेवा निगमले दुबई स्टेसनको शङ्कास्पद बैङ्क खातामा गएको क्याटरिङसँग सम्बन्धित भुक्तानी रकम फिर्ता गराउन कानुनी कारबाही अगाडि बढाइएको जनाएको छ । 
दुबई स्टेसनको इमेल ह्याक गरी ५ लाख ३५ हजार ९ सय १३ दिराम शङ्कास्पद खातामा जम्मा भएको जानकारीमा आएलगत्तै यस सम्बन्धमा निगमले आन्तरिक छानबिन गरिरहेको जनाएको छ ।
००००
कोशी प्रदेशमा अप्रत्याशित विद्रोह गराएका नेपाली कांग्रेसका नेता डा शेखर कोइरालाले आफ्नो कदमको चलाखीपूर्ण बचाउ गरेका छन् । उनी १५ औं महाधिवेशनमा पनि फेरि सभापतिमा अगाडि बढ्ने तयारी गरिरहेका छन् । 

यही तयारीकाबीच शेखरले अस्वाभाविक रुपमा पार्टीका ८ सांसदलाई विद्रोह गराउँदै आफू निकटका केदार कार्कीलाई मुख्यमन्त्री बनाउन उनले सफलता हात पारेका छन् । तर प्रतिस्पर्धी र विपक्षी एमालेको सहारा लिएर गरिएको यो विद्रोहपछि शेखर झनै चुनौतीपूर्ण अवस्थामा रहेका छन् । आफ्नै टिमका महामन्त्री गगन थापाकोसमेत असन्तुष्टिकाबीच आफ्नो विरासत बोकेको भूगोल कोशीमा उनले सम्भावित संकटको सामना गरेरै विद्रोह गर्ने आँट गरेका थिए ।
००००
उपप्रधान तथा गृहमन्त्री नारायणकाजी श्रेष्ठको स्वास्थ्यवस्था सामान्य बन्दै गएको छ । जनवादी चीनको भ्रमणका क्रममा कात्तिक १ गते हृदयाघात भएपछि उनी बेइजिङस्थित पेकिङ मेडिकल कलेज अस्पतालमा उपचाररत छन् ।  
००००
नेपाल जापानलाई पराजित गर्दै एसीसी यू–१९ प्रिमियर कप क्रिकेट प्रतियोगिताको फाइनलमा प्रवेश गरेको छ । 
मलेसियामा शनिवार भएको सेमिफाइनल नेपालले जापानलाई डकवर्थ लेविस पद्धतिमा १४४ रनले पराजित गर्दै फाइनलमा प्रवेश गरेको हो । नेपाल फाइनलमा पुगेसँगै पाकिस्तानमा हुने यू–१९ एसिया कप क्रिकेट प्रतियोगिताका लागि पनि छनोट भएको छ ।
००००
त्रिदेशीय टी–२० सिरिजमा हङकङविरुद्ध सहज जीत निकालेको नेपाल एक खेलअघि नै फाइनलमा प्रवेश गरेको छ ।
मुलपानी क्रिकेट मैदानमा शनिवार दिउँसो सकिएको खेलमा नेपालले हङकङमाथि ७९ रनको फराकिलो जीत निकालेको हो ।