अस्थायी आवास निर्माणस्थल छनोटको २ मापदण्ड तय

सरकारले जाजरकोट भूकम्पबाट प्रभावितहरूको अस्थायी आवास निर्माण स्थल छनोटसम्बन्धी दुई वटा मापदण्ड तय गरेको छ । 

भूकम्प प्रभावित घरपरिवारलाई अस्थायी आवास निर्माण अनुदान कार्यविधि, २०८० मा सरकारले अस्थायी आवास निर्माण स्थलको छनोट गर्दा बाढी, पहिरो लगायत विपद्को जोखिमबाट समेत सुरक्षित हुने स्थान हुनुपर्ने गरी मापदण्ड तय गरेको हो ।  

यस्तै  अस्थायी आवास निर्माण गर्दा पछि स्थायी आवासका लागि सुरक्षित जग्गा छुट्याएर निर्माण स्थलको छनोट गर्नु गर्नुपर्ने उल्लेख गरिएको छ । 

यस्तै लाभग्राहीले आफूसँग उपलब्ध जमिनको आकार प्रकार तथा परिवारको संख्याका आधारमा तोकिएको ढाँचा र निर्माण सामग्रीलाई आधार मानी स्थानीय स्रोत सामग्रीको प्रयोग गरी उपयुक्त आवास निर्माण गर्न सक्ने कार्यविधिमा उल्लेख छ । 

यस्तै सम्भव भएसम्म पछि निर्माण गरिने स्थायी आवासको लागि सतह विस्तार गरेर जोड्न मिल्ने गरी (रूपान्तरण योग्य) बनाउनुपर्नेछ । 

यसैगरी अस्थायी आवास निर्माण गर्दा तत्काल भूकम्पले क्षति गरेको घरका उपयोगी सामान प्रयोग गर्न सकिने कार्यविधिमा उल्लेख छ । यसबाहेक अस्थायी आवासमा प्रयोग भएका जस्तापाता लगायतका सामग्रीहरू पुनः उपयोग गर्न मिल्ने गरी बनाउनु पर्ने कार्यविधिमा उल्लेख छ । 

यदि त्यस्तो सम्भव नभए भविष्यमा भान्सा घर, गोदाम, गोठ, मतान आदिमा उपयोग हुने गरी बनाउन सकिने कार्यविधिबाट छुट दिइएको छ । 

अस्थायी आवास निर्माणका लागि सम्बन्धित स्थानीय तहलाई सहरी विकास मन्त्रालयले प्राविधिक सहयोग उपलब्ध गराउनेछ भने  अस्थायी आवास निर्माणको सूचना प्रणालीको लागि स्थानीय तह र प्रदेश सरकारलाई राष्ट्रिय विपद् जोखिम न्यूनीकरण तथा व्यवस्थापन प्राधिकरणले तालिम लगायत प्राविधिक सहयोग उपलब्ध गराउनेछ ।