चर्चित गायक सुशान्त केसीले आफ्नो पछिल्लो गीत ‘झ्याल बाट’को भिडियो युट्युबबाट हटाएका छन् । 

भिडियोमा अभिनेत्री उपासना सिंह ठकुरी प्रहरीको पोसाकमा प्रस्तुत थिइन् । अनुमतिबिना प्रहरीको पोसाक प्रयोग हुन गएको भन्दै सुशान्तले युट्युबबाट भिडियो हटाएका हुन् । 

उनले सामाजिक सञ्जालमा एक भिडियो सन्देश जारी गर्दै अनुमतिबिना प्रहरीको पोसाक प्रयोग भएकोप्रति माफी समेत मागेका छन् । ‘हाम्रो भिडियोमा पुलिसको युनिफर्म प्रयोग भएको थियो । केही निश्चित दृश्यका लागि हामीले नेपाल पुलिसबाट अनुमति लिनुपर्ने भयो’ उनले भने, ‘त्यसैले अहिलेका लागि भिडियो हटाउनुपर्ने भयो । अब हामीले के गर्ने भनेर टिमसँग बसेर सोँचिरहेका छौँ । सुट गरिरहेका छौँ । थप जानकारी दिने नै छौँ । यसका लागि सबैसँग माफी पनि माग्छु ।’ 

भिडियोमा सुशान्त स्वयंमले समेत अभिनय गरेका थिए ।

प्रहरी प्रधान कार्यालयले केही महिनाअघि मात्रै विज्ञप्ति जारी गर्दै भिडियोमा नेपाल प्रहरीको पोसाक प्रयोग गर्दा अनुमति अनिवार्य भनेको थियो ।