विपिनको रिहाइबारे कतारको सकारात्मक जवाफ, रुसी सेनामा २०० नेपाली कार्यरत

‘लोकान्तर राउण्ड अप’मा पाठकवृन्दलाई स्वागत छ । सधैँझैँ आज पनि हामी बितेको २४ घण्टाका मुख्यमुख्य घटनाक्रमसहित उपस्थित भएका छौँ–
परराष्ट्रमन्त्री एनपी साउदले र कतारका प्रधानमन्त्री शेख मोहम्मद बिन अब्दुल रहमान अल–थानीसँग हमासले बन्दी बनाएका नेपाली विद्यार्थी विपिन जोशीको रिहाइका पहल गरिदिन आग्रह गरेका छन् ।

कतारको राजधानी दोहामा रहमानसँगको शिष्टाचार भेटमा साउदले जोशीको रिहाइका लागि पहल गरिदिन आग्रह गरेका हुन् । जोशीको शीघ्र रिहाइका लागि थप सशक्त पहल गरिदिन विशेष अनुरोध गरेको मन्त्री साउदका स्वकीय सचिव दीपक जोशीले जानकारी दिए । 

परराष्ट्रमन्त्री साउदले हमाससँग कतारको सम्पर्क, मध्यपूर्वको समस्यामा कतारले निर्वाह गरिरहेको सक्रिय मध्यस्थकर्ताको भूमिका एवं कतार र नेपालबीच जनस्तर समेतको गहिरो एवं मित्रवत सम्बन्धका आधारमा नेपाल सरकारले उच्च आशा गरेको बताए ।

जवाफमा कतारका प्रधानमन्त्री अल थानीले विपिन जोशीलगायत विदेशी बन्दीहरूको रिहाइका लागि कतार सरकारले उच्च प्रयास गरिरहेको बताए । उनले  चाँडै सकारात्मक परिणाम आउन सक्ने संकेत समेत गरेका छन् । उनले नेपालसँगको सम्बन्धलाई कतार सरकारले प्राथमिकतामा राखेको पनि बताए ।

नेपाली कांग्रेसले केन्द्रीय कार्यसम्पादन समितिको बैठक बोलाएको छ ।

महासमिति बैठकसहितको विषयमा छलफल गर्न आगामी शुक्रवार दिउँसो १२ बजेर १५ मिनेटमा केन्द्रीय कार्यालयमा बस्नेगरी बैठक बोलाइएको कांग्रेस केन्द्रीय कार्यालयका मुख्य सचिव कृष्णप्रसाद पौडेलले जानकारी दिए ।
००००
यसैगरी नेपाली कांग्रेसको शेखर कोइराला पक्षको बैठक बुधबार मात्रै बस्ने भएको छ । यसअघि मंगलबार बस्ने भनिएपनि नेताहरुबीचको परामर्शपछि बुधबार मात्रै बैठक बस्ने सहमति भएको हो । उक्त बैठकमा महामन्त्री गगन थापा पनि सहभागी हुनेछन् । 

कांग्रेस नेता अर्जुन नरसिंह केसीले मंगलबारको बैठक बुधबारका लागि तय गरिएको बताए ।
यसैगरी पटक–पटक सर्दै आएको नेपाली कांग्रेसको महासमिति बैठक फेरि पनि सर्ने भएको छ ।
००००
संघीय संसद्को महासचिवमा पदमप्रसाद पाण्डेको नाम सिफारिस भएको छ । वर्तमान महासचिव भरतराज गौतमले राजीनामा दिएपछि प्रतिनिधिसभा सभामुख देवराज घिमिरे र राष्ट्रियसभा अध्यक्ष गणेशप्रसाद तिमल्सिनाले पाण्डेलाई महासचिवका लागि राष्ट्रपति रामचन्द्र पौडेलसमक्ष सिफारिस गरेका हुन् । 
००००
राष्ट्रिय स्वतन्त्र पार्टी (रास्वपा)ले संसदीय दलको विधान पुनःसंरचना गर्ने निर्णय गरेको छ । केन्द्रीय कार्यालय वनस्थलीमा बसेको संसदीय दलको बैठकमा दलको विधानमा पुनःसंरचना गर्ने विषयमा छलफल भएको सो पार्टीका प्रमुख सचेतक सन्तोष परियारले जानकारी दिए ।
००००
काठमाडौँ महानगरपालिकाले  केही स्थानका सामुदायिक कुकुरमा ‘डिस्टेम्पर’ रोग देखा परेकाले सचेत रहन आग्रह गरेको छ ।  

महानगर पशुपन्छी विभागका प्रमुख डा अवधेश झाका अनुसार यो रोग कुकुरका लागि प्राणघातक मानिन्छ । यस रोग लागेका कुकुरलाई विशेषगरी ज्वरो आउँछ । खाना खान सक्दैनन् भने झोक्राउने, नाकमा सिँगान र आँखामा चिप्रा देखिने जस्ता लक्षण देखिन्छन् । त्यस्तै खोक्ने, बान्ता गर्ने, पातलो दिशा गर्ने, छारे रोगजस्तो लक्षण देखाउने, लड्बडाएर हिँड्ने, किटकिट गरेर दाँत बजाउने यस रोगका मुख्य लक्षण हुन् ।  
००००
चितवन राष्ट्रिय निकुञ्जले जङ्गली हात्ती ध्रुवेलाई रेडियोकलर जडान गरेको छ । हात्तीलाई सोमबार दिउँसो निकुञ्जको सुखीभार क्षेत्रको घाँसे मैदानमा डार्ट गरी रेडियोकलर जडान गरिएको निकुञ्जका सूचना अधिकारी गणेशप्रसाद तिवारीले जानकारी दिए।

 हात्तीको घाँटीमा रेडियोकलर जडान गरिएको छ । रेडियो कलर जडान गरेसँगै हात्तीको निगरानी निकुञ्जले गर्न सजिलो हुने उनले बताए ।     
००००
वैदेशिक रोजगार विभाग ईपीएस शाखा कार्यालयले परीक्षार्थीलाई धर्ना, जुलुस जस्ता कार्यक्रम तत्काल बन्द गर्न अनुरोध गरेको छ ।
 दक्षिण कोरियामा उत्पादनमुलक क्षेत्रका लागि कामदार माग गर्दा यसअघि सञ्चालित ‘सीप बिल्डिङ’मा अनुत्तीर्ण परीक्षार्थीले आवेदन दिन नपाउने भनेपछि परीक्षार्थीले कार्यालयमा धर्ना दिँदै आएका थिए ।
००००
जनता समाजवादी पार्टी (जसपा) नेपालको केन्द्रीय कार्यकारिणी समितिको सोमबार बसेको बैठकले विभिन्न निर्णय गरेको छ । जसअनुसार आगामी माघ ११ गते हुने राष्ट्रिय सभा निर्वाचन प्रयोजनका लागि निधारित समयमै दल दर्ता गर्ने निर्णय भएको छ ।
००००
कोशी प्रदेशसभाको बैठकमा ‘प्रदेश निजामती सेवा ऐन, २०७९ लाई संशोधन गर्न बनेको विधेयक, २०८०’ सर्वसम्मतिले पारित भएको छ ।
कोशी प्रदेशको प्रदेशसभा नियमावली (पहिलो संशोधन समेत), २०७४ को नियम १०८ बमोजिम मुख्यमन्त्री केदार कार्कीका तर्फबाट आन्तरिक मामिला तथा कानूनमन्त्री शम्शेर राईले सो प्रस्ताव पेश गरेका थिए ।
००००
प्रधानमन्त्री पुष्पकमल दाहाल प्रचण्डले हरेक दिन सत्ता गठबन्धन तोडेर सरकार ढाल्ने प्रयास भएको दाबी गरेका छन् । प्रेस सेन्टर नेपालको पदाधिकारी बैठकलाई सोमवार सम्बोधन गर्दै प्रधानमन्त्री प्रचण्डले रातदिन गठबन्धन तोड्ने र सरकार ढाल्ने खेल भइरहेको आरोप लगाएका हुन् ।
यसैबीच रुसी सेनामा २०० जना नेपाली कार्यरत रहेको प्रधानमन्त्रीले औपचारिक जानकारी आएको बताएका छन् । 
००००
लगानीकर्ताहरू प्रोफिट बूकिङमा लाग्दा शेयर बजारमा सोमवार झण्डै ५ अर्ब बराबरको कारोबार भएको छ ।
अघिल्लो दिन १११ अंकले बढेको शेयर बजारमा धेरैले एकैपटक प्रोफिट बूकिङ गर्दा कारोबार रकम ४ अर्ब ८४ करोड २७ लाख नाघेको हो ।