‘लोकान्तर राउण्ड अप’मा पाठकवृन्दलाई स्वागत छ । सधैँझैँ आज पनि हामी बितेको २४ घण्टाका मुख्यमुख्य घटनाक्रमसहित उपस्थित भएका छौँ–
राष्ट्रियसभाको शुक्रवारको बैठकले स्थानीय र प्रदेश सरकारले संवैधानिक अधिकार प्रयोग गर्न पाउनेगरी आवश्यक कानून बनाउन सरकारलाई निर्देशन दिएको छ ।
बैठकमा राष्ट्रिय सरोकार तथा समन्वय समितिको सङ्घीयता कार्यान्वयनसँग सम्बन्धित अध्ययन प्रतिवेदनमाथिको छलफल र प्रधानमन्त्री पुष्पकमल दाहाल ‘प्रचण्ड’को जवाफपछि अध्यक्ष नारायणप्रसाद दाहालले सो निर्देशन दिएका हुन् ।
ंंंं००००
गृह मन्त्रालयले मेडिकल व्यवसायी दुर्गा प्रसाईंको नाममा इजाजत जारी भएको हतियारका विषममा एक छानबिन समिति गठन गरेको छ । बिहीवारको गृहमन्त्रीस्तरीय निर्णयबाट मन्त्रालयका सहसचिव राजेन्द्रदेव पाण्डेको संयोजकत्वमा शुक्रवार मन्त्रालयले छानबिन समिति गठन गरेको गृहका सूचना अधिकारी एकदेव अधिकारीले जानकारी दिए ।
००००
त्रिभुवन विश्वविद्यालय (त्रिवि)ले स्नातक तहको प्रश्नपत्र नेपाली र अंग्रेजी दुवै भाषामा तयार पार्ने निर्णय गरेको छ । 
त्रिविले शुक्रवार साँझ सूचना जारी गर्दै वार्षिक परीक्षा प्रणाली अनुसारका सबै संकायको स्नातक तहका प्रश्नपत्रहरू अंग्रेजी र नेपाली दुवै भाषामा अनिवार्य तयार गर्नुपर्ने जनाएको हो ।
००००
अध्यक्ष केपी शर्मा ओलीको गृहजिल्ला झापामा नेकपा एमालेको नेतृत्व छनोट चुनावी प्रक्रियाबाट गरिने भएको छ । अध्यक्ष ओलीले सर्वसम्मत नेतृत्व चयन गर्न निर्देशन दिएपनि झापाका नेता–कार्यकर्ताले त्यसलाई नमानेपछि चुनावी प्रक्रिया अगाडि बढाइएको छ । 
अध्यक्ष ओलीले उद्घाटन सत्रमा एमाले झापाका कार्यवाहक अध्यक्ष प्रेम गिरीलाई अध्यक्ष बनाउन खुल्ला मञ्चबाटै भनेका थिए । सचिव शिव ढुङ्गेल दाबीबाट पछाडि नहटेपछि झापामा एमालेको जिल्ला अधिवेशन रोचक बनेको छ । 
००००
अर्थ मन्त्रालयले आगामी आर्थिक वर्ष २०८१–८२ का लागि बजेट मस्यौदा लेखन समिति गठन गरेको छ ।
अर्थमन्त्री वर्षमान पुनले शुक्रबार आगामी आवका लागि बजेट लेखन समिति गठन गरेका उनको सचिवालयले जनाएको छ ।
००००
उपप्रधान एवं गृहमन्त्री रवि लामिछानेले जनतालाई परिवर्तनको अनुभूति हुनेगरी काम गर्न मातहतका सबै निकायलाई निर्देशन दिएका छन् ।
जिल्ला प्रशासन कार्यालय झापामा जिल्लास्थित सुरक्षा निकायका प्रमुखहरूसँग जिल्लाको सुरक्षा अवस्थाबारे जानकारी लिँदै उनले कागजमा भन्दा पनि परिणाम देखिने गरी काम गर्न सम्बद्ध निकायलाई निर्देशन दिएका हुन् ।
००००
नेपाली कांग्रेसका सांसद टेकबहादुर गुरुङको निलम्बन फुकुवा भएको छ ।
सर्वोच्च अदालतका न्यायाधीशद्वय मनोजकुमार शर्मा र विनोद शर्माको इजलासले शुक्रवार गुरुङको निलम्बन फुकुवा गरेको हो । सर्वोच्चका प्रवक्ता वेदप्रसाद उप्रेतीले गुरुङको निलम्बन फुकुवा भएको जानकारी दिए । 
००००
प्रधानमन्त्री पुष्पकमल दाहाल ‘प्रचण्ड’ले आगामी आर्थिक वर्षको नीति तथा कार्यक्रम र बजेटलाई जनमुखी बनाइने बताएका छन् । 
मकवानपुरमा शुक्रबार नेकपा माओवादी केन्द्रका स्थानीय नेता एवं कार्यकर्तासँगको भेटमा प्रधानमन्त्री प्रचण्डले बजेटलाई जनमुखी बनाउने तयारीका साथ सरकार अगाडि बढेको बताए ।
००००
बागमती प्रदेशका मुख्यमन्त्री शालिकराम जम्कट्टेलले यही चैत १९ गते विश्वासको मत लिने भएका छन् ।
मुख्यमन्त्री जम्कट्टेलको दल नेकपा माओवादी केन्द्रका सचेतक रत्नप्रसाद ढकालले विश्वासको मत लिनेसम्बन्धी प्रस्ताव प्रदेशसभा सचिवालयमा शुक्रवार दर्ता गराएसँगै १९ गतेका लागि मिति तय भएको हो । 
००००
नेपाली बजारमा लगातार उकालो लागिरहेको सुनको मूल्य प्रतितोला २ हजार १ सय रुपैयाँले बढेको छ ।
बिहीवार प्रतितोला १ लाख २७ हजार ९ सय रुपैयाँमा कारोबार भएको छापावाल सुन शुक्रबारका लागि १ लाख ३० हजार रुपैयाँ निर्धारण गरिएको छ ।
००००
अन्तर–व्यवस्थापिका सङ्घ आइपीयूको एक सय ४८ औं महासभामा सहभागी भई प्रतिनिधि सभाका सभामुख देवराज घिमिरे नेतृत्वको दश सदस्यीय प्रतिनिधिमण्डल शुक्रबार स्विट्जरल्यान्डबाट स्वदेश फिर्ता भएको छ ।       
यही चैत १० देखि १४ गतेसम्म सङ्घको प्रधान कार्यालय जेनेभामा सञ्चालन भएको महासभामा सहभागी हुन सभामुख घिमिरे नेतृत्वको प्रतिनिधिमण्डल यही चैत ८ गते त्यसतर्फ प्रस्थान गरेको थियो ।