खराब मौसम र हावाहुरीका कारण त्रिभुवन अन्तर्राष्ट्रिय विमानस्थलमा जहाज अवतरण गर्न सकिरहेका छैनन् । बिहीवार अपरान्ह साढे ४ बजेको समयमा विदेशबाट आउने जहाज अन्तै डाइभर्ट गरिएका छन् भने केही आकाशमै होल्ड भएका छन् । 

विमानस्थलका प्रवक्ता सुवास झाका अनुसार चीनबाट आएको चाइना इस्टर्न जहाज बंगलादेशको ढाका डाइभर्ट गरिएको छ भने भारतको दिल्लीबाट आएको इन्डिगो जहाज दिल्लीमै फिर्ता भएको छ । 

त्यस्तै बंगलादेशको ढाकाबाट आएको विमान, दिल्लीबाट आएको भिस्तारा र दोहाबाट आएको कतार एयरवेजका तीनवटा जहाज यतिबेला काठमाडौंको आकाशमा होल्ड गरिएका छन् ।

यस्तै हावाहुरीका कारण आन्तरिक विमानहरू पनि गन्तव्यमा पुग्न सकेका छैनन् । 

काठमाडौंबाट पोखरा उडेको यति एयरलाइन्सको विमान काठमाडौंमै फिर्ता भएको छ भने नेपालगञ्जबाट काठमाडौं आएको बुद्ध एयरको विमान भैरहवा डाइभर्ट गरिएको छ । 

प्रवक्ता झाका अनुसार सिमराबाट काठमाडौं आएको बुद्ध एयर पनि सिमरामै फिर्ता हुन बाध्य भएको छ ।