संसद्‌मा कांग्रेस र सभामुखको सवालजवाफ

प्रतिपक्षी दल नेपाली कांग्रेसको अवरोधबीच नीति तथा कार्यक्रम पारित गर्ने तयारी गरेको सरकार मुठभेडबाट पछि हटेको छ । विपक्षी दलको अवरोधबीच विश्वासको मत र केही विधेयक पेश गरेको सरकार शुक्रवार मुठभेडबाट पछि हटेको हो । 

मंगलवार बसेको प्रतिनिधि सभा बैठकमा सभामुख देवराज घिमिरेले जेठ ११ गते शुक्रवारका लागि छलफलको समय तोकेका थिए । आज नीति तथा कार्यक्रम पारित गर्ने तयारी भए पनि अन्तिममा सरकार पछि हटेको हो । 

सहकारी ठगी सम्बन्धमा गठन गर्ने भनिएको संसदीय छानबिन समितिमा सहमतिको सम्भावना बढेकोले नीति तथा कार्यक्रम पारित गर्ने कार्यक्रम आइतवारसम्म धकेलिएको सत्तापक्षका एक नेताले जानकारी दिए । संसद् बैठकअघि कानून मन्त्री पदम गिरीले आज दिनभरिमा सहमति जुट्ने दाबी गरेका थिए । 

त्यसपछि शुक्रवार बसेको बैठकमा कांग्रेसले बोल्न पाउने भन्दै उठेर अवरोध गरेको थियो । तर, सभामुखले कांग्रेसलाई बोल्न दिएनन् । शुक्रवारको बैठक स्थगित गर्नुअघि सदनमा कांग्रेस र सभामुखबीच केहीबेर सवालजवाफ भएको थियो । 

सभामुख देवराज घिमिरेले संसदमा विधिसम्मत् बोल्न दिने भन्दै संसद्‌को काम कारबाही अगाडि बढाउन आग्रह गरेका थिए । कांग्रेस सांसदहरूले भने प्रतिपक्षी दललाई बोल्न दिनुपर्ने बताए । ‘प्रतिपक्षले बोल्ने भनेको परिस्थितिलाई असहज बनाउने भन्ने होइन, संसद्‌मा बोल्न पाउनु पर्छ’ महामन्त्री विश्वप्रकाश शर्माले भने । केहीबेर सवाल जवाफ भएपछि सभामुखले आइतवार बिहान सम्मको लागि बैठक स्थगित गरेका छन् । 

‘यहाँहरूको सहयोग नरहेपछि आजको कार्यसूचीमा सबै विषय हटाएर बैठक जेठ १३ गते आइतवारसम्म लागि स्थगित हुन्छ’ घिमिरेले भने । कार्यसूचीमा सरकारका नीति तथा कार्यक्रममाथि छलफल गर्ने र प्रधानमन्त्रीले जवाफ दिने उल्लेख थियो । जेठ १५ मा बजेट ल्याउनु पर्ने संवैधानिक बाध्यता रहेका कारण सरकारले आज जसरी पनि नीति तथा कार्यक्रम पारित गर्ने रणनीति बनाएको थियो ।