जनता समाजवादी पार्टी (जसपा)को विवादबारे निर्वाचन आयोगको इजलासमा बिहीवारदेखि बहस शुरू भएको छ ।

अध्यक्ष उपेन्द्र यादव पक्षले अर्का अध्यक्ष महन्थ ठाकुर तथा ठाकुर पक्षले उपेन्द्र यादवलाई कारवाही गरेपछि विवाद निर्वाचन आयोगमा पुगेको थियो । एकले अर्कालाई गरेको कारवाहीलाई निर्वाचन आयोगले मान्यता नदिएपछि यसअघि दुवै पक्षलाई बोलाएर छलफल गरेको थियो । 

अध्यक्ष यादवले मिल्न नसक्ने भन्दै प्रक्रियामा जान आयोगमा आग्रह गरेपछि आयोगको इजलास बसेको हो । 

उपेन्द्र यादव पक्षले कार्यकारीणी समिति र संसदीय दल दुवैतर्फ बहुमत रहेको दाबी गरेको छ । 

निर्वाचन आयोगका प्रवक्ता राजकुमार श्रेष्ठले आज बहस सकिएपनि फैसला नआउने बताए । 

प्रतिनिधि सभा विघटन र केपी शर्मा ओलीको सरकारमा सहभागिताको विषयलाई लिएर जसपाभित्र विवाद शुरू भएको थियो ।