विवेकशील साझा पार्टीले काठमाडौं महानगरपालिकाका लागि चुनावी घोषणा पत्र सार्वजनिक गरेको छ । 

शनिवार पार्टी केन्द्रीय कार्यालयमा पत्रकार सम्मेलन आयोजना गरेर उक्त पार्टीले उम्मेदवारसहित प्रतिज्ञा पत्र सार्वजनिक गरेको हो ।

वैशाख ३० गते हुने स्थानीय तह निर्वाचनका लागि विवेकशील साझाले काठमाडौं महानगरपालिकाको मेयर र उपमेयरमा क्रमशः समीक्षा बास्कोटा र कीर्ति तुलाधरलाई उम्मेदवार बनाएको छ ।

पत्रकार सम्मेलनमा विवेकशील साझा पार्टीका अध्यक्ष रविन्द्र मिश्रले एक पटक काठमाडौं महानगरमा काम गर्ने मौका दिन मतदातालाई आग्रह गरेका छन् । उनले भने, ‘अरूलाई तपाईंहरूले पटक-पटक मौका दिइरहनुभएको छ । हामीले काम गर्ने एक मौका खोजेका छौं । यो लोकतन्त्र हो, हामीले काम गरेर देखाउन सकेनौँ भने अर्को पटक मौका नदिए हुन्छ ।’

आफ्ना पार्टीको उम्मेदवारको परिपक्वता, क्षमता र इमान्दारिता परीक्षण गर्न पनि उनले मतदातालाई आग्रह गरेका छन् । 

प्रतिज्ञा पत्र सार्वजनिक गर्ने कार्यक्रममा मेयरकी उम्मेदवार समीक्षा बास्कोटाले विवेकशील साझाले उमेर र महिला सशक्तीकरणका हिसाबले ४० वर्षमुनिको युवा महिला र ६० वर्षमाथिको अर्को महिलालाई उम्मेदवारको रूपमा अघि सारेको बताइन् । 

बास्कोटाले भनिन्, ‘काठमाडौं महानगरमा समस्याका चाङ छन् । व्यक्तिगत समस्या समाधान गर्न संघर्ष गरेजस्तै हामी महानगरको समस्या पनि झेल्दै जुझ्दै समाधान गर्छौँ । इन्मान्दारिता, पारदर्शिताका आधारमा काठमाडौं महानगरका लागि काम गर्ने प्रतिबद्धता जनाउँछु ।’ 

पार्टीकी केन्द्रीय सदस्यसमेत रहेकी ३८ वर्षीय उम्मेदवार बास्कोटाले कानून विषय अध्ययन गरेकी छन् ।

उपमेयरकी उम्मेदवार ६२ वर्षीय कृति तुलाधारले आफू उपमेयरमा सफल भएमा काठमाडौं महानगरलाई सफा, सुन्दर र संस्कृतिको संरक्षण गर्ने प्रतिज्ञा जनाइन् ।

यस्तो छ प्रतिज्ञापत्र