भरतपुर महानगरपालिकाको प्रमुख (मेयर) पदका स्वतन्त्र उम्मेदवार जगन्नाथ पौडेलले उम्मेदवारी फिर्ता लिन अस्वीकार गरेका छन् ।

कांग्रेसका तर्फबाट मेयरको आकांक्षी रहेका पौडेलले स्वतन्त्र उम्मेदवारी दिएपछि त्यसलाई फिर्ता लिन आग्रह गर्दै बिहीवार निवासमै पुगेका गृहमन्त्री बालकृष्ण खाँणलाई पौडेलले आफू धेरै अगाडि बढिसकेको बताएका हुन् ।

'फिर्ता नहुने ठाउँमा पुगिसकेको छु भनेर मैले भनें,' गृहमन्त्री खाँणसँगको भेटपछि पौडेलले भने, 'चितवन जिल्ला र साथीहरूको मान, प्रतिष्ठा र भविष्यसँग जोडिएको विषय हो । म एक्लैले निर्णय लिने कुरा हैन ।'

उनले आफ्नो कारण सरकार र गठबन्धनलाई अप्ठ्यारो पर्नुपर्ने कुनै कारण नरहेको बताए ।

'मेरो कारण गठबन्धनलाई अप्ठ्यारो पर्नुपर्ने कारण म देख्दिनँ । सरकारको र गठबन्धनको संकटसँग जोडेर मलाई हेर्नुहुँदैन,' पौडेलले गृहमन्त्रीसँग भनेको कुरा उल्लेख गर्दै भने, 'परिस्थिति धेरै अगाडि बढिसकेको छ । मैले एउटा सामान्य नागरिकका हिसाबले उम्मेदवारी दिएको हुँ ।'

उनले पार्टीले अनुशासनको कारवाही गरेको खण्डमा पनि आफूलाई कुनै गुनासो नहुने बताए ।

'अनुशासनको सीमा नाघ्यो भन्ने लाग्यो भने कारवाही गर्ने व्यवस्था पनि छ । त्यसमा मेरो कुनै गुनासो हुँदैन,' पौडेलले भने ।

भेटमा गृहमन्त्री खाँणले पार्टीको निर्णय मानेर अगाडि बढ्न आग्रह गरेका थिए ।

'हामी सबै नेपाली कांग्रेसको कार्यकर्ता हौं । निर्वाचनको बेलामा पार्टीले गरेको निर्णयलाई अगाडि बढाऔं (भनेको छु),' भेटपछि गृहमन्त्री खाँणले सञ्चारकर्मीलाई भने, 'उहाँ पार्टीको प्रतिबद्ध कार्यकर्ता नै हो ।
पार्टीको निर्णय पालना गर्न मद्दत गर्नुहुन्छ भन्ने मेरो विश्वास छ ।'

पौडेलले उम्मेदवारी फिर्ता लिन अस्वीकार गरेपछि गृहमन्त्री खाँण पुन: भेट्ने वाचासहित बाहिरिएका छन् ।

'पुन: भेट्ने भन्नुभाछ, मैले हुन्छ भन्देको छु,' पौडेलले सञ्चारकर्मीसँग भने ।

भरतपुर महानगरपालिकामा सत्ता गठबन्धनका तर्फबाट माओवादी केन्द्रकी रेनु दाहाल उम्मेदवार बनेकी छिन् ।