नेकपा एकीकृत समाजवादीका अध्यक्ष माधवकुमार नेपालले गठबन्धनको विषयमा समीक्षा गर्नुपर्ने बताएका छन् ।

मंगलवार २९औं मदन–आश्रित स्मृति दिवसको अवसरमा नेकपा एकीकृत समाजवादीले पार्टी केन्द्रीय कार्यालयमा आयोजना गरेको कार्यक्रमलाई सम्बोधन गर्दै अध्यक्ष नेपालले गठबन्धनको विषयमा समीक्षा गरिने बताए ।

स्थानीय तह निर्वाचनको परिणाम आफ्नो पार्टीले प्राप्त गर्नुपर्ने जति नभएको उनले बताए । उनले पार्टीले अपेक्षा गरेअनुसार मत परिणाम नआएको भन्दै गठबन्धनका घटकहरूले नै आफूहरूसँग सहकार्य गर्न नचाहेको उल्लेख गरे ।

उनले भने, ‘हाम्रो पार्टी निर्माणका सवालमा हामीले गम्भीर छलफल चलाउनुपर्ने आवश्यकता छ । हामी निर्वाचनको पनि गम्भीर समीक्षा गर्नेछौं । गठबन्धनको पनि समीक्षा हामी गर्नेछौं । समीक्षा गरेर कहाँ राम्रो भयो, कहाँ त्रुटि गर्‍यौं र आगामी दिनमा हामीले के कुरामा होस गर्नुपर्ने हो । त्यस हुनाले हामीले अहिलेसम्मको निर्वाचनको परिणाम अवश्य पनि हाम्रो पार्टीले प्राप्त गर्नुपर्ने जति छैन होला । संख्याको हिसाबले ५०० सदस्यको तहलाई अहिले हामी नाघिरहेका छौं । सय जनाको संख्यामा वडाध्यक्ष जित्ने स्थिति बनाएका छौं । झण्डै १५, २० जना पालिकाका प्रमुख, उपप्रमुख जित्ने स्थिति बनेको छ । कतिपय ठाउँहरूमा राम्रै अवस्था पनि छ । अझै पनि कतिपय ठाउँहरूमा हामीले अपेक्षित परिणाम प्राप्त गर्न सकेका छैनौं । गठबन्धन दलका सदस्यहरूले हामीसँग सहकार्य गर्न चाहेनन् । हाम्रा आफ्नै कुराहरू होलान् । अरुका आफ्नै गुनासाहरू होलान् । जेसुकै गरे पनि यो पार्टीलाई बलियो जगमा उभ्याउनुपर्नेछ । यो पार्टीलाई जनताको माझमा क्रियाशील गर्नुपर्नेछ ।’

पार्टीलाई वैचारिक रूपमा दह्रो बनाउनुपर्ने उनले बताए । अध्यक्ष नेपालले पार्टीलाई बलियो जगमा उभ्याउँदै जनताको माझमा क्रियाशील गराउन नेता, कार्यकर्ताहरूलाई आग्रह गरे ।