राप्रपा नेपालका अध्यक्ष कमल थापाले धार्मिक स्वतन्त्रतासहितको हिन्दु राष्ट्र र प्रत्यक्ष निर्वाचित प्रधानमन्त्रीको पक्षमा वकालत गरेका छन् । विराटनगरमा शनिबार आयोजित छुट्टाछुट्टै कार्यक्रममा उनले यस्तो बताएका हुन् । 

विराटनगरमा‘वर्तमानका चुनौती र विकल्प’ विषयमा बुद्धिजीवी वर्ग र उद्योग वाणिज्य क्षेत्रका प्रतिनिधिहरुसँगको अन्तर्क्रियामा बोल्दै अध्यक्ष कमल थापाले धार्मिक स्वतन्त्रता सहितको हिन्दु राष्ट्र, प्रत्यक्ष निर्वाचित प्रधानमन्त्री, समानुपातिक निर्वाचन प्रणाली राप्रपा नेपालको प्रस्ताव रहेको बताए । 
 
थापाले राप्रपा नेपाललाई मुलुकको बैकल्पिक शक्तिको रुपमा स्थापित गर्न आफूहरु प्रयासरत भएको पनि बताए । सो क्रममा थापाले आर्थिक दुरावस्थाका कारण आगामी दिनमा मुलुक झन् सङ्कटग्रस्त हुने सम्भावना औंल्याए ।  उनले समस्याको निकास दिन र मुलुकलाई असफलता बाट जोगाउन सबै क्षेत्रबाट दलीय स्वार्थ र वाद भन्दा माथि उठेर सोच्नु पर्नेमा जोड दिए । 

यसैगरी प्रदेश १ स्तरीय अगुवा कार्यकर्ता भेलाको पनि अध्यक्ष थापाले राप्रपा नेपाललाई मुलुकको राष्ट्रिय राजनीतिमा स्थापित गराएरै छाड्ने दृढता व्यक्त गरे । संगठन निर्माणलाई केन्द्रमा राखेर उच्च मनोबल सहित जनतामा जान समेत थापाले कार्यकर्ताहरूलाई आग्रह गरे ।