प्रतिनिधि सभाले गठन गरेको महाभियोग सिफारिस समितिले सर्वोच्च अदालतका निलम्बित प्रधानन्यायाधीश चोलेन्द्रशमशेर जबरासँग भदौ १५ गते छलफल गर्ने भएको छ । बुधवार बसेको सिफारिस समितिको बैठकले चोलेन्द्रलाई भदौ १५ गते समितिमा बोलाउने निर्णय गरेको हो । 

‘भदौ १५ गते निलम्बित प्रधानन्यायाधीशलाई आफ्ना कुरा राख्न दिने सहमति भएको छ’ समितिका एक सदस्यले भने । 

अदालतमा भ्रष्टाचारलाई बढावा दिएको, मन्त्रिपरिषद्मा भागबण्डा खोजेकोलगायत आरोप लगाउँदै सत्ता गठबन्धनले चोलेन्द्रविरुद्ध महाभियोग प्रस्ताव दर्ता गरेको थियो । फागुन १ गते चोलेन्द्रविरुद्ध सत्ता गठबन्धनका ९८ सांसदले महाभियोग दर्ता गरेका थिए । ढिलो गरी फागुन २९ गते प्रतिनिधि सभामा पेश गरेर सिफारिस समिति गठन भएको थियो । 

झण्डै ६ महिना पछि साउन २२ गते मात्र प्रतिनिधि सभाले महाभियोग प्रस्ताव सिफारिस समितिमा पठाएको थियो ।