राष्ट्रपति विद्या भण्डारीले नेपाली सेनाका प्रधानसेनापति, पूर्वप्रधानसेनापतिसहित उच्च अधिकारीसँग छलफल गरेकी छिन् । रक्षामन्त्री हुँदादेखि सेनाको परमाधिपति हुँदासम्म सहयोग गर्नेलाई धन्यवाद दिनको लागि कार्यक्रम आयोजना गरिएको शीतलनिवास स्रोतले लोकान्तरलाई बतायो । 

बुधवार अपरान्ह भएको भेटघाटमा नेपाली सेनाका प्रधानसेनापति प्रभुराम शर्मा, पूर्वप्रधानसेनापति पूर्णचन्द्र थापा र प्यारजंग थापा सहभागी भएका थिए । रथी भन्दा माथिल्लो दर्जाका पूर्व र बहालवाला अधिकारीलाई शीतलनिवासमा बोलाइएको थियो । 

‘रक्षामन्त्री हुँदादेखि चिनजान भएका र राष्ट्रपति हुँदा विभन्न ठाउबाट योगदान गरेका सबैसँग भेटघाटका लागि कार्यक्रम तय भएको हो’ राष्ट्रपति भण्डारीका संचारविज्ञ टीका ढकालले लोकान्तरसँग भने, ‘जंगी अड्डासँगको समन्वयमा कार्यक्रम तय भएको हो ।’

नागरिकता विधेयकलाई लिएर राष्ट्रपति भण्डारीले राजीनामा गर्ने सम्मको चर्चाकाबीच बुधवार शीतलनिवासमा वर्तमान र पूर्व सेनापतिसहितको जमघट भएको हो । संचारविज्ञ ढकालले छलफलको खास एजेण्डा नभएको बताए । 
‘राष्ट्रपतिज्यू देशका विभिन्न ठाउँमा जादा सहयोग गरेका र विदेश जाँदा त्यहाँ डिफेन्स एट्याची रहेकादेखि शीतलनिवासको सुरक्षामा खटिएका अधिकारीहरु आउनु भएको थियो’ ढकालले भने । स्रोतका अनुसार उपस्थित सेनाका पूर्व जर्नेलहरूले नागरिकता विधेयक फिर्ता गरेर राम्रो काम गरेको बताएका थिए । 

प्रतिनिधि सभामा पुनर्विचारका लागि पठाएको नागरिकता विधेयक जस्ताको तस्तै पारित गरेपछि राष्ट्रपति भण्डारीले संविधानविद् लगायतसँग परामर्श गरिरहेकी छिन् । प्रतिनिधि सभाबाट फेरि आउन लागेको विधेयक प्रमाणीकरण गर्नुभन्दा राजीनामा गर्नु उपयुक्त हुने कतिपय संविधानविद्ले भण्डारीलाई सुझाव दिएका थिए । 

यो पनि ..

नागरिकतालाई चुनावी मसला बनाउने एमाले प्रयास– राष्ट्रपतिको राजीनामासम्मको चर्चा !