नेकपा एकीकृत समाजवादीले समानुपातिक निर्वाचन प्रणालीतर्फको उम्मेदवारलाई नदोहोर्‍याउने भएको छ । यसअघि २०७४ सालमा भएको निर्वाचनमा समानुपातिकतर्फ उम्मेदवार भएकालाई यसपटक नदोहोर्‍याउने मापदण्ड तयार पारेको हो । 

निर्वाचन आयोगले आइतवार र सोमवार प्रतिनिधि सभा र प्रदेश सभातर्फको समानुपातिक उम्मेदवारको बन्दसूची बुझाउन राजनीतिक दलहरूलाई समय दिएको छ । शनिवार अधिकांश दलहरू उम्मेदवारको बन्द सूची तयार पार्न जुटिरहेका छन् । 

नेकपा एसले पनि उम्मेदवार छनोटको मापदण्ड तय गरेको हो । उक्त मापदण्डअनुसार गत वैशाखमा सम्पन्न स्थानीय तहको निर्वाचनमा उम्मेदवार बनेकालाई पनि उम्मेदवार नबनाउने भएको छ । 

त्यस्तै, विगतमा दुई पटक वा सोभन्दा बढी समानुपातिक सांसद वा राष्ट्रिय सभाको सदस्य भएकालाई अहिलेको बन्दसूचीमा नराखिने महासचिव बेदुराम भुसालले जानकारी दिए ।