अख्तियार दुरुपयोग अनुसन्धान आयोगले विशेष अदालतमा दायर गरेका मुद्दाका आरोपीले इन्कारी बयान दिँदा सफाइ पाउने गरेको देखिएको छ ।

इन्कारी बयान दिँदा आरोपीले सफाइ पाएकोसहित ७ मुद्दा बोकेर अख्तियारले सर्वाेच्च अदालतमा पुनरावेदन गरेको छ ।

अख्तियारका प्रवक्ता श्यामप्रसाद भण्डारीले बुधवार प्रेस विज्ञप्ति जारी गर्दै पुनरावेदन गरिएका मुद्दाबारे जानकारी दिएका छन् । आयोगको मंगलवारको बैठकले पुनरावेदनको निर्णय गरेको हो । विशेष अदालतको फैसलाउपर आयोगलाई चित्त नबुझी सर्वाेच्च अदालतमा पुनरावेदन गरिएको जनाइएको छ ।

राजस्व चुहावटको मुद्दामा मनोजकुमार विक समेतलाई सफाइ दिएको, घुस लेनदेन मुद्दामा छेदिलाल शाह सोनारमाथिको आरोपदाबी नपुग्ने फैसला भएको, घुस लेनदेन मुद्दामा लुद्रबहादुर केसी र राजेशबहादुर द्वाललाई सफाइ दिएको, घुस मुद्दामा राम औतार चौधरी र रामप्रसाद रानालाई सफाइ दिएको, रकम हिनामिना मुद्दामा लालकुमार झा, पवनकुमार महतो र गेहुप्रसाद डंगौरालाई सफाइ दिएको, घुस मुद्दामा सन्दिप पौडेल र विक्रम बस्नेतलाई सफाइ दिएको, घुस मुद्दामा हरिप्रसाद चौधरी, विशेश्वरप्रसाद साहु, आनन्दलालप्रसाद साह समेतलाई सफाइ दिएकोविरुद्ध अख्तियारले सर्वाेच्चमा मुद्दा दायर गरेको छ ।