सत्ता गठबन्धनमै आबद्ध दल जनमतबाट उपराष्ट्रपतिमा उम्मेदवारी दर्ता गराएपछि ममता झाले संविधानको मर्मअनुसार अगाडि बढेको बताएकी छन् ।

३ चैतमा हुने उपराष्ट्रपतिको निर्वाचनका लागि शनिबार उम्मेदवारी दर्ता गरेपछि झाले संविधानको मर्मअनुसार आधा आकाश ढाक्ने महिला नै उपराष्ट्रपति हुनुपर्ने बताइन् ।  

‘नेपालको संविधानको मर्मलाई बुझ्दै संविधानप्रति अडिग रहँदै सशक्त रुपमा लाग्नुपर्छ भन्नेमा म दृढ छु । म कानुनको छात्रा पनि हुँ । महिलाले आधा अकाश ढाकेका छन् । तर ३३ प्रतिशत मात्रै दिइएको छ । सबै जातजाति सबैको प्रतिनिधित्व भए मात्रै विकास हुन सक्छ । मधेसबाट आएको महिला हुँ । संविधानलाई जीवित राख्न उम्मेदवारी दिएको छु,’ उनले भनिन् ।

झाको उम्मेदवारी दर्तापछि जनमत पार्टीका अध्यक्ष सीके राउतले पनि संविधान र निर्वाचन आयोगको व्याख्याअनुसार उम्मेदवारी दर्ता भएको बताए ।

सत्ता गठबन्धनकै सहमतिअनुसार तीन जनाको उम्मेदवारी दर्ता भएको भन्दै उनले आइतबारसम्म दलहरूको साझा उम्मेदवार हुन सक्ने बताए ।

आफूहरूले मित्रवत् प्रतिस्पर्धा गर्ने उनको भनाइ छ ।