आफ्ना प्रायः सिर्जना मार्फत छुट्टै खालको तरंग ल्याउँदै आएका गायक एवं सर्जक हुन् प्रकाश सपूत । उनको पछिल्लो गीत ‘सकम्बरी’ले यतिबेला त्यस्तै खालको तरंग उत्पन्न गराइदिएको छ ।​ 

युट्युबमा सार्वजनिक गरिएको केही घण्टामै शीर्ष स्थानमा आएको गीतले पाँच दिनमै ६७ लाख प्लस भ्युज पाइसकेको छ । 

यतिबेला उनका सिर्जनालाई रुचाउँदै आएका स्रोता दर्शकलाई विशेष खबर छ । गायक प्रकाशले स्रोता दर्शकले निकै रुचाएको आफ्नो गीत ‘बोल माया’को सिक्वेल यसवर्ष सार्वजनिक गर्ने भएका छन् । 

वैदेशिक रोजगारीको कथामा निर्मित उक्त गीत प्रकाशलाई छुट्टै उचाई दिने गीत थियो । ‘बोल माया’पछि उनले त्यसअघि र पछिको कथामा ‘गलबन्दी’ सार्वजनिक गरेका थिए ।

चार वर्षअघि सार्वजनिक उक्त गीतले निकै चर्चा कमायो । सो गीतको अन्तिममा प्रकाशले एउटा कौतूहलता छाड्दै उल्लेख गरेका थिए – बोल माया २ प्रतीक्षा गर्नुहोला ।

चार वर्षपछि उनी ‘बोल माया’को सिक्वेलको तयारीमा जुटेका हुन् । प्रकाशका हरेक गीतमा जोडिएर काम गर्दै आएका उनका भाइ सुनिल वि.क.ले यसवर्ष ‘बोल माया २’ ल्याउने कुरा रहेको जानकारी दिएका हुन् ।  

‘दाईले अब ‘बोल माया २’ को तयारी गर्ने भन्नुभएको छ’ सुनिलले एक अन्तवार्तामा भनेका छन् ‘जेठतिरबाट ‘बोलमाया २’ को तयारी गर्न सक्छौं । पहिलेको कथालाई निरन्तरता दिनुपर्ने छ ।’ त्यसपछि प्रकाशले आफ्नो डेब्यू फिल्म ‘परदेशी २’को प्रचारप्रसारलाई समय दिनेछन् । उक्त फिल्म आगामी दशैंमा प्रदर्शनमा आउँदैछ ।

प्रकाशले आफै पनि फिल्म निर्माणको कामलाई अगाडि बढाउने सोच बनाएका छन् । त्यसका लागि भने अलि समय लाग्ने प्रकाशका भाइ सुनिलले बताएका छन् ।

प्रकाशले वर्ष २०८० मा ‘जातीय विभेदविरुद्धको वर्ष’ का रूपमा सिर्जना ल्याउने बताएका छन् । पछिल्लो गीत ‘सकम्बरी’को पनि भाग २ ल्याउने घोषणा प्रकाशले भिडियोमार्फत नै गरेका छन् । ​

यतिबेला भने उनी​ साङ्गीतिक कार्यक्रमको शिलशिलामा अमेरिकामा छन् ।