सशस्त्र जनयुद्धको बेला बालसेना प्रयोग गरेर युद्धअपराध गरेको भन्दै नेकपा माओवादी केन्द्रका अध्यक्ष एवं प्रधानमन्त्री पुष्पकमल दाहाल प्रचण्ड तथा पूर्वप्रधानमन्त्री डा. बाबुराम भट्टराईविरुद्ध परेको रिटलाई सर्वोच्चले अग्राधिकार दिएको छ ।

न्यायाधीश सपना प्रधान मल्लको एकल इजलासले मंगलवार विपक्षीको नाममा कारण देखाऊ आदेश जारी गर्दै रिटलाई अग्राधिकार दिएको हो । 

राष्ट्रसंघीय निकाय अनमिनको प्रमाणीकरणमा अयोग्य भएका बाल सैनिक लेनिन विष्टले दायर गरेको रिटमाथि प्रारम्भिक सुनुवाइ गर्दै सर्वोच्चले कारण देखाऊ आदेश गरेको हो । 

मंगलवार वरिष्ठ अधिवक्ता डा. सुरेन्द्र भण्डारी, रमेश बडाल, स्वागत नेपाल, त्रिलोकबहादुर चन्द, ज्ञानेन्द्र आरण, लक्ष्मी रेग्मी, ओमप्रकाश अर्याल, देवेन्द्रलाल नेपाली, ईश्वरी भट्टराई, विष्णु भट्टराई, तुल्सीराम पोखरेल, विक्रम भण्डारीलगायतले बहस गरेका थिए । 

शुरूमा सर्वोच्च प्रशासनले दर्ता गर्न अस्वीकार गरेको रिट न्यायाधीश आनन्दमोहन भट्टराईको आदेशपछि दर्ता भएको थियो । 

माओवादी घटकहरूले भने आफूलाई बालसैनिक दाबी गरेका लेनिन माओवादी जनयुद्धमा सामेल समेत नभएको दाबी गर्दै आएका छन् ।