काठमाडौँमा ड्रोनबाट गस्ती, एनआरएनलाई नागरिकता

‘लोकान्तर राउण्ड अप’मा पाठकवृन्दलाई स्वागत छ । सधैँझैँ आज पनि हामी बितेका २४ घण्टाका मुख्यमुख्य घटनाक्रमसहित उपस्थित भएका छौँ–
खाद्य व्यवस्था तथा व्यापार कम्पनीले दसैँका लागि आज मङ्गलबारदेखि बिक्री गर्ने खसीबोका तथा च्याङ्ग्राको मूल्य निर्धारण गरेको छ । कम्पनीले जीउँदो खसीबोका प्रतिकिलो रु छ सय ८० तथा च्याङ्ग्रा प्रतिकिलो रु एक हजार दुई सय ६० मा बिक्री गर्नेछ ।
००००
गैरआवासीय नेपाली (एनआरएन)लाई नागरिकता दिन सुरु गरिएको छ।  
प्रधानमन्त्री पुष्पकमल दाहाल प्रचण्डले आज उनीहरूलाई गैरआवासीय नेपाली नागरिकता वितरण गर्ने कार्यको शुभारम्भ गर्ने कार्यक्रम छ । 
पहिलो गैरआवासीय नेपाली नागरिकता वर्तमान अध्यक्ष कुल आचार्यले पाउने भएका छन् । आचार्यले सामाजिक सञ्जालमार्फत यसबारे जानकारी दिँदै खुसी व्यक्त गरेका छन् । 

यसैबीच एनआरएनएको ११ औँ विश्वसम्मेलन काठमाडौँमा आजैदेखि सुरु भएको छ।  नयाँ नेतृत्व चयन गर्दै कात्तिक ३ मा विश्वसम्मेलन सम्पन्न हुनेछ । 
००००
प्रधानमन्त्री पुष्पकमल दाहाल ‘प्रचण्ड’ले विभिन्न नाममा परिवर्तनका उपलब्धिलाई उल्ट्याउन भइरहेको षड्यन्त्रलाई परास्त गर्न जरुरी रहेको बताएका छन् ।  

धनगढीमा आयोजित समाजवादी मोर्चा नेपालको सन्देशसभामा नेकपा माओवादी केन्द्रका अध्यक्षसमेत रहेका प्रधानमन्त्री दाहालले देशका विभिन्न ठाउँमा जातीय, धार्मिक विद्वेषका नाममा प्रकट भएका घटना परिवर्तनका उपलब्धिलाई उल्ट्याउन चाहने प्रतिगामी र प्रतिक्रान्तिको ‘डिजाइन’ भएको बताए ।
००००
काठमाडौं प्रहरीले दशैंका बेला ड्रोनबाट सुरक्षा गस्ती गर्ने भएको छ ।
प्रहरी परिसर काठमाडौंका प्रवक्ता एसपी कुमोद ढुङ्गेलका अनुसार चाडपर्वलाई लक्षित गरेर भीडभाड हुने ठाउँमा ड्रोनबाट सुरक्षा गस्ती गर्न थालिएको हो ।
००००
नेपालीहरूको महान चाड दशैंलाई लक्षित गरेर व्यापारीले खसीबोका र च्याङ्ग्रा राजधानी काठमाडौंको बजारमा उपलब्ध गराएका छन् ।
प्रत्येक वर्ष दशैंमा मुस्ताङलगायत हिमाली जिल्लाबाट काठमाडौंमा च्याङ्ग्रा र देशभरका विभिन्न जिल्लाबाट खसीबोका ल्याउने गरिएको छ । 
घटस्थापनाको दिनदेखि नै भक्तपुरको सल्लाघारीमा च्याङ्ग्रा बेच्न थालिएको छ । जिउँदो च्याङ्ग्राको मूल्य प्रतिकिलो १३ सय कायम गरिएको छ ।
००००
नेपाल कम्युनिस्ट पार्टी (नेकपा)का महासचिव नेत्रविक्रम चन्द विप्लवले कम्युनिस्ट शक्तिहरू कमजोर हुँदा काठमाडौंको सडकमा परिवर्तनविरोधी नारा लाग्न थालेको आरोप लगाएका छन् । उनले नयाँ खुलेका दललाई विषालु झारपातको संज्ञा दिए ।
००००
नेकपा माओवादी केन्द्रले कोशी प्रदेशका मुख्यमन्त्री केदार कार्कीलाई विश्वासको मत दिने भएको छ । माओवादी केन्द्र कोशी प्रदेशको सोमवार बसेको बैठकले गठबन्धन कायम राख्नका लागि विश्वासको मत दिने निर्णय गरेको हो ।

माओवादी केन्द्र कोशी प्रदेशका इञ्चार्ज चक्रपाणि खनाल बलदेवले मत दिनुपर्छ भन्ने निष्कर्षमा आफूहरू पुगेको बताए । उनले  केन्द्रबाट कुनै निर्देशन भने नआएको  बताए । मुख्यमन्त्री केदार कार्कीले बुधबार विश्वासको मत लिने भएका छन् । 
००००
उपप्रधान एवं गृहमन्त्री नारायणकाजी श्रेष्ठ तेस्रो बेल्ट एन्ड रोड फोरम फर इन्टरनेसनल कोअपरेसन (बीआरएफ)मा सहभागी हुन सोमबार चीन प्रस्थान गरेका छन् ।
००००
धितोपत्र बजारमा शेयर कारोबार मापक नेप्से परिसूचक सोमवार दोहोरो अंकले ओरालो लागेको छ । नेपाल स्टक एक्सचेञ्जका अनुसार नेप्से परिसूचक २३ दशमलव १६ अंकले ओरालो लागेर एक हजार आठ सय ५१ मा सीमित भएको छ ।
००००
नेपाल विद्युत् प्राधिकरणले यस वर्ष पनि ‘डबल ए प्लस’ (ए–ए प्लस) क्रेडिट रेटिङ पाएको छ । इक्रा नेपाल लिमिटेडले प्राधिकरणको क्रेडिट रेटिङ गरी ‘इक्रा एनपी डबल ए प्लस’ स्तरको रेटिङ प्रदान गरेको हो । अघिल्लो वर्ष पनि प्राधिकरणले सोही रेटिङ पाएको थियो ।
००००
स्वास्थ्य तथा जनसङ्ख्या मन्त्रालयले देशभरका स्वास्थ्य संस्था र सम्बन्धित निकायलाई चट्याङबाट सुरक्षित राख्नुका साथै चट्याङबाट हुने घाइतेको उचित व्यवस्थापनका लागि पूर्वतयारी गर्न आह्वान गरेको छ ।
००००
राष्ट्रिय स्वतन्त्र पार्टी (रास्वपा)का सभापति रवि लामिछानेले आफू र आफ्नो पार्टीले मुलुकको परिवर्तनका लागि योगदान गर्ने सबै नेताको योगदानप्रति उच्च सम्मान र कदर गर्ने बताएका छन् ।    

रास्वपाद्वारा मूल दस्तावेज निर्माणका लागि सुझाव लिन सोमवार राजधानीमा आयोजित ‘नीति मन्थन’ कार्यक्रममा उनले विषयकेन्द्रित कटाक्ष गरे पनि परिवर्तनमा अन्य राजनीतिक दलका नेताको योगदानलाई अवमूल्यन नगरेको स्पष्ट पारे ।