बिरामीको मृत्युपछि आम्दा अस्पतालमा तनाब: मेसुमाथि कुटपिट, घाइते डाक्टरको आईसीयूमा उपचार हुँदै

बुटवलस्थित सिद्धार्थ महिला तथा बाल अस्पताल (आम्दा)मा सुत्केरीको मृत्यु भएपछि डाक्टरमाथि कुटपिट भएको छ । बिरामीका आफन्तको आक्रमणबाट अस्पतालका मेडिकल सुपरिटेन्डन (मेसु) डा. राजेन्द्र बस्याल गम्भीर घाइते भएका छन् । उनको लुम्बिनी प्रादेशिक अस्पतालको आईसीयूमा उपचार भइरहेको छ । 

गुल्मीको सत्यवती गाउपालिका ठूलो लुम्पेक घर भई भैरहवामा बस्दै आएकी ३२ वर्षीया भवानी रास्कोटीको मंसिर ११ गते अपरेसन गरी बच्चा जन्मेको थियो । मंगलबार सुत्केरी महिलाको मृत्यु भएपछि अस्पतालमा तनाब उत्पन्न भएको थियो । 

इलाका प्रहरी कार्यालय बुटवलका प्रमुख डीएसपी दानबहादुर थापाले सुत्केरीको मृत्यु भएपछि तनाब उत्पन्न भएको र मृतकका आफन्तले डाक्टरमाथि आक्रमण गरेको जानकारी दिए ।

सुत्केरीको मृत्यु भएपछि उत्पन्न तनाब समाधानमा क्रममा बिरामीका आफन्तले डा. बस्यालमाथि आक्रमण गरी गम्भीर घाइते बनाएको अस्पताल प्रशासनले जनाएको छ । अस्पताल स्रोतका अनुसार मृतकका आफन्तले मृत्युको विषयमा छानबिन गर्नेभन्दा पनि सुरुदेखि नै ५० लाख रुपैयाँ क्षतिपूर्ति रकम मागेपछि स्थिति असहज बन्दै गएको थियो । 

छलफलकै क्रममा बिरामीका आफन्तले चिकित्सकहरूमाथि कार्यालयकै कुर्सी टेबलका खुट्टा भाचेर टाउको र छातीमा प्रहार गरेको अस्पताल जनाएको छ ।  अस्पताल प्रशासनसँग सहमति भई मृतकको शव आफन्तले शव बहानमा राखेर निस्कने तयारी भए पनि केही उत्तेजक समूहको भीड पसेर मेसु बस्यालमाथि आक्रमण गरेको एक चिकित्सकले बताए। 

अहिले मृतक महिलाको शव अस्पताल परिसरमै शव बहानमा राखिएको छ । मृतकका आफन्तको आक्रमणले अस्पतालको प्रशासनिक भवनका झ्याल ढोकालगायत फर्निचर तोडफोड भएका छन् ।

अस्पताल अहिले प्रहरीको सुरक्षामा रहेको र कुनै पनि नयाँ बिरामीहरूको भर्ना गरिएको छैन । बिहान २ बजेबाट अस्पताल आउने बिरामीहरू अस्पतालकको गेटबाटै फर्काइएको छ भने अहिले अस्पतालका भर्ना भएर उपचाररत बिरामीहरू हेर्नेबाहेक सबै काम ठप्प रहेको अस्पताल प्रशासनले जनाएको छ । 

प्रहरीले घटनामा संलग्न ४ जनालाई नियन्त्रणमा लिएर अनुसन्धान शुरू गरेको जनाएको छ । ‘हामीले घटनामा संलग्न भएका ४ जनालाई नियन्त्रणमा लिएर अनुसन्धान थालेका छौं,’ थापाले लोकान्तरसँग भने । 

अस्पतालका बाल रोग विशेषज्ञ डा. सन्तोष पोखरेलले आक्रमणबाट डा. बस्याल गम्भीर अवस्थामा पुगेको बताए । ‘उहाँको पेटमा रगत बगेको छ । आईसीयूमा उपचार भइरहेको छ । टाउकोमा पनि गम्भीर चोट छ,’ पोखरेलले लोकान्तरसँग भने ।