तत्काल मन्त्रिपरिषद् पुनर्गठन नहुने, देउवाको ‘उत्तराधिकारी’ बन्ने प्रयासमा ७ नेता

‘लोकान्तर राउण्ड अप’मा पाठकवृन्दलाई स्वागत छ । सधैँझैँ आज पनि हामी बितेको २४ घण्टाका मुख्यमुख्य घटनाक्रमसहित उपस्थित भएका छौँ–
प्रधानमन्त्री पुष्पकमल दाहाल ‘प्रचण्ड’ले तत्काल मन्त्रिपरिषद् पुनर्गठन नहुने बताएका छन् । 

जलवायु परिवर्तनसम्बन्धी संयुक्त राष्ट्रसङ्घीय सम्मेलन ‘कोप’ २८ मा सहभागी भएर आइतवार स्वदेश फर्किएका प्रधानमन्त्रीले त्रिभुवन अन्तर्राष्ट्रिय विमानस्थलमा यस्तो बताएका हुन् ।

मन्त्रिपरिषद् पुनर्गठनबारे सञ्चारकर्मीले राखेको प्रश्नको जवाफ दिँदै प्रधानमन्त्रीले भने, ‘सरकार गठन भएको बेलादेखि नै को हट्ने, गृहमन्त्री हट्ने चर्चा चल्ने गरेको छ, तर अहिले कुनै त्यस्तो छलफल छैन, सोचिएको पनि छैन ।’

आफ्नो दिमागमा मन्त्रिपरिषद् पुनर्गठनबारे कुनै सोच नभएको उनले बताए । ‘यो सबै हल्ला मात्र हो, यसमा कुनै सत्यता छैन’ उनले थपे । 
यस्तै प्रधानमन्त्रीले जलवायु परिवर्तनको जोखिममा परेका मुलुकले भोग्नुपरेका समस्या सम्बोधन गर्न ढिला गर्न नहुने पनि बताएका छन् ।
००००
१३ औं र १४ औं महाधिवेशनमा लगातार सभापति भएका शेरबहादुर देउवा पुनः यो पदको दौडमा छैनन् ।

१५ औं महाधिवेशनमा देउवाको दाबेदारी नै नहुने भएपछि देशकै सबैभन्दा ठूलो र पुरानो पार्टी कांग्रेसमा नेतृत्व हत्याउने गरि उनलाई खुशी बनाउन कम्तीमा ७ नेता लागेका छन् । जसमा कृष्ण सिटौला, विमलेन्द्र निधि, प्रकाशमान सिंह, गगन थापा, पूर्ण बहादुर खड्का, शशांक कोइराला र शेखर कोइराला छन् । 
००००
सामाजिक सञ्जाल फेसबूक ह्याक भएको भन्दै उजुरी गर्नेको संख्या ह्वात्तै बढेको छ ।
नेपाल प्रहरीको साइबर ब्यूरोमा २ दिनमा मात्रै २४९ वटा उजुरी दर्ता भएका छन् ।
ब्यूरोका इन्स्पेक्टर राजकुमार खड्गीका अनुसार आइतवार मात्रै १ सय ४० जनाले आफ्नो फेसबूक ह्याक भएको भन्दै उजुरी दिएका छन् । शुक्रवार १ सय ९ जनाले उजुरी दिएका उनले बताए ।
८० वटा उजुरी आफै ब्यूरोमा उपस्थित भएर दर्ता गराएका छन् भने इमेलबाट ६० जनाले उजुरी दिएका छन् ।

शुक्रवार इमेल र सिधा ब्यूरोमा आएर १ सय ९ जनाले उजुरी दिएको इन्स्पेक्टर खड्गीले बताए । ‘पछिल्लो समय अत्यधिक फेसबूक ह्याक भएका उजुरी परेका छन्,’ इन्स्पेक्टर खड्गीले लोकान्तरसँग भने । 
आफ्नो फेसबूकलाई सुरक्षित राख्नका लागि पनि उनले आग्रह गरेका छन् ।
००००
एफसी बुटवल लुम्बिनीले नेपाल सुपर लिग (एनएसएल) फुटबल प्रतियोगितामा पहिलो जित दर्ता गराएको छ । 

त्रिपुरेश्वरस्थित दशरथ रङ्गशालामा आज भएको खेलमा बुटवल लुम्बिनीले स्पोर्टिङ इलाम एफसीलाई २–१ गोल अन्तरले पराजित गर्दै प्रतियोगितामा पहिलो जित दर्ता गराएको हो । लुम्बिनीको जितमा स्टेफन बियोङ र एरिक विष्टले गोल गरे । 
००००
नेकपा एमालेका अध्यक्ष केपी शर्मा ओलीले जनताका समस्या बुझ्न सङ्कल्प यात्रा आयोजना गरिएको बताएका छन् । पार्टीले आयोजना गरेको ‘झुलाघाट चिवाभञ्ज्याङ, समृद्धिका लागि सङ्कल्प यात्रा’ को चौथो दिन आइतबार कर्णालीको दैलेखस्थित राकम कर्णालीमा आयोजित आमसभामा उनले उक्त कुरा बताएका हुन् ।
००००
मधेस प्रदेशका आठवटै जिल्लामा लागूऔषधबारे चेतना फैलाउने उद्देश्यले ‘लागूऔषधविरुद्धको अभियान’ सुरु भएको छ । 

मधेस प्रदेश प्रहरी कार्यालयले  महोत्तरीको बर्दिबासमा आयोजना गरेको कार्यक्रममा अभियानको शुभारम्भ गर्दै मुख्यमन्त्री सरोजकुमार यादवले प्रदेशमा बढ्दै गएको लागूऔषधको गैरकानुनी प्रयोग र त्यसबारेमा समुदायस्तरमा जागरण ल्याउने अभियान महत्वपूर्ण हुने विश्वास व्यक्त गरे ।
००००
नेपाली कांग्रेसको प्रथम लुम्बिनी प्रदेश सम्मेलनले तहगत संरचनालाई पूर्णरुपमा जिम्मेवारी दिन पार्टीको केन्द्रसँग आग्रह गरेको छ ।
बुटवलमा आइतवार सम्पन्न भएको सम्मेलनले पार्टीको तल्ला संरचनालाई तहगत जिम्मेवारी दिन र हस्तक्षेपकारी भूमिका निर्वाह नगर्न केन्द्रलाई आग्रह गरेको हो ।
००००
संस्कृति, पर्यटन तथा नागरिक उड्डयनमन्त्री सुदन किराँतीले भैरहवास्थित गौतमबुद्ध अन्तर्राष्ट्रिय विमानस्थलबाट नियमित रुपमा अन्तर्राष्ट्रिय उडान गर्ने कामलाई सरकारले प्राथमिकता दिएको बताएका छन् ।

नेपाल एसोसिएसन अफ ट्राभल्स एन्ड टुर एजेन्ट लुम्बिनी प्रदेशको प्रतिनिधिमण्डलसँग आज मन्त्रालयमा मन्त्री किराँतीले यस्तो बताएका हुन्  । विमानस्थलमा अन्तर्राष्ट्रिय उडान गर्ने जहाजलाई प्रत्येक उडानको रु पाँच लाख प्रोत्साहनस्वरुप दिनेगरी सरकारले कार्यक्रम ल्याउन लागेको उनलले जानकारी दिएका छन् ।
००००
नेपाल वायु सेवा निगमले आफ्नो कमजोरीका कारण युरोपेली युनियन (ईयू)ले नेपाललाई उडान सुरक्षा चासो सूची (कालोसूची)बाट नहटाएको भन्ने आरोप खण्डन गरेको छ ।
निगम कार्यकारी समितिको बैठकले निगमको कमजोरीका कारण ईयूले नेपाललाई सेफ्टी लिस्टबाट नहटाएको भन्ने प्रचारप्रति असहमति प्रकट गरेको हो ।
००००
नेपाल स्टक एक्सचेन्ज (नेप्से) परिसूचक ७ दशमलव २९ अङ्कले घटेको छ ।
नेप्से परिसूचक आइतवार ७ दशमलव २९ अङ्कले घटेर १ हजार ८ सय ५१ दशमलव २३ को विन्दुमा सीमित भएको छ ।
००००
विशेष अदालतमा न्यायाधीश हेरफेरका कारण आइतवार इजलास नै बस्न सकेन । 
अध्यक्षसहित सदस्य न्यायाधीशहरूको सरुवा भएका कारण आइतवार दैनिक पेसी नतोकिएको हो ।
००००
माघ ११ गते हुने राष्ट्रिय सभा निर्वाचनका लागि उम्मेदवारी मनोनयन पुस २३ गते हुने भएको छ । 
आयोगले आइतवार एक विज्ञप्ति प्रकाशित गरी निर्वाचन कार्यक्रम सार्वजनिक गरेको हो ।
००००
कोशी प्रदेशका मुख्यमन्त्री केदार कार्कीले विनाविभागीय मन्त्रीहरूलाई जिम्मेवारी दिएका छन् ।

मुख्यमन्त्री कार्कीले आइतवार शमशेर राईलाई आन्तरिक मामिला तथा कानून, गणेशप्रसाद उप्रेतीलाई पर्यटन, वन तथा वातावरण र कमलप्रसाद जबेगुलाई भौतिक पूर्वाधार तथा यातायात मन्त्रालयको जिम्मेवारी दिएका हुन् ।
००००
त्रिभुवन अन्तर्राष्ट्रिय विमानस्थलभित्र यात्रुको ह्यान्डब्यागमा आगो लागेको छ । आइतबार बिहान ११ बजेको उडानमार्फत् चीन जान लागेका एक चिनियाँ यात्रुको ह्यान्डब्यागमा आगो लागेको हो ।
००००
नेपाली बजारमा सुनको मूल्य फेरि बढेको छ । आइतबार छापावाल सुन प्रतितोला एक लाख २० हजार ८०० रुपैयाँमा कारोबार भएको नेपाल सुनचाँदी व्यवसायी महासंघले जनाएको छ । जुन अहिलेसम्मकै उच्च मूल्य हो ।