विराटनगर उपमहानगरपालिका– ७ स्थित सातघुम्तीको कवाडी गोदाममा बुधवार दिउँसो आगलागी हुँदा पाँचजना घाइते भएका छन् । घाइतेमध्ये ३ जनाको अवस्था गम्भीर रहेको मोरङ प्रहरीले जनाएको छ । 

‘पाँचजना घाइतेमध्ये तीनको अवस्था गम्भीर छ,’  मोरङ प्रहरीका प्रवक्ता डीएसपी रञ्जनकुमार दाहालले लोकान्तरसँग भने ।

घाइतेमध्ये चार जनाको उपचार विराटनगरस्थित न्युरो हस्पिटल र एकको कोशी अस्पतालमा उपचार भइरहेको डीएसपी दाहालले जानकारी दिए । 

विराटनगर महानगर, दुहबी र सुन्दरहरैँचा  नगरपालिकाको दमकल स्थानीय र प्रहरीको सहयोगमा आगलागी नियन्त्रणको प्रयास भइरहेको प्रहरीले जनाएको छ । 

आगलागीको कारण अहिले खुलिनसकेको प्रहरीको भनाइ छ । घाइतेहरूको पहिचान पनि हुन सकेको छैन ।