पूर्वपश्चिम राजमार्गअन्तर्गत रुपन्देहीको बुटवलदेखि कपिलवस्तुको गोरूसिंगेसम्मको सडक ‘फोर लेन’मा स्तरोन्नति गर्न टेन्डर प्रक्रिया शुरू भएको छ । पहिलो खण्डअन्तरर्गत बुटवलदेखि गोरूसिंगेसम्म ५० किलोमिटर सडक दुई खण्डमा स्तरउन्नति गर्ने गरी सडक विभागले बिहीवार टेन्डर आह्वान गरेको हो । 

तीन वर्षभित्र सक्ने लक्ष्य आयोजनाको टेन्डर आह्वान गरिएको सडक विभाग वैदेशिक सहायता कार्यान्वन महाशाखाका उपमहानिर्देशक विजय जैसीले बताए ।   

‘३० दिनको समय दिएर टेन्डर आह्वान छ,’ जैसीले लोकान्तरसँग भने, ‘यो सडक दुई प्याकेजमा बन्नेछ । २५–२५ किमी दुई खण्डबाट बन्नेछ ।’ उनका अनुसार यो आयोजनाको डिजाइनसमेत तयार भइसकेको छ । विस २०२० सालमा बनेको यो सडकखण्ड ६ दशकपछि स्तरउन्नति हुने भएको हो । 

बुटवल, गोरुसिंगे हुँदै चन्द्रौटासम्म सडक स्तरउन्नति गर्ने योजना भए पनि पहिलो चरणमा बुटवल–गोरूसिंगेका लागि टेन्डर आह्वान भएको हो । यो सडक विस्तारको योजना नेकपा (एमाले)का उपाध्यक्ष तथा पूर्वअर्थमन्त्री विष्णु पौडेलले ल्याएका थिए । यो सडक बनेपछि यात्रा ४० प्रतिशतले घटने अपेक्षा गरिएको छ । बुटवल–नारायणगढ ११४ किमी सडक विस्तारको क्रममा छ । अबको सडक विस्तारले कपिलवस्तुदेखि नारायणगढसम्मको सडक यात्राको समय छोट्टिनेछ । आयोजनाको लागत अनुमान २२ अर्ब रुपैयाँ रहने छ । 

एमालेका उपाध्यक्ष पौडेलले आयोजना टेन्डर आह्वाप्रति खुसी व्यक्त गर्दै निर्धारित मितिमै गुणस्तरीय काम हुनेमा विश्वास व्यक्त गरे ।

‘स्थानीय जनताको चाहना र राष्ट्रिय आवश्यकतालाई आत्मसात गर्दै लामो समयदेखि हामीले गरेको प्रयासअनुरूप बोलपत्र आह्वान भएको छ,’ पौडेलले भने, ‘तर, हामीकहाँ पूर्वाधार निर्माणका आयोजनाहरू निर्धारित गुणस्तर, समय र लागतमा सम्पन्न नहुने चिन्ताजनक अवस्था रहिआएको छ ।’ 

विश्वबैंकको ऋण लगानीमा सम्पन्न हुने यस आयोजनाले थप दुर्गति बेहोर्न नपरोस् भनेर स्तरोन्नति गर्न लागिएको नेता पौडेलको भनाइ छ । ‘स्वस्थ एवम् पारदर्शी प्रक्रियाद्वारा सक्षम निर्माण कम्पनी छनोट गरियोस् र छनोट हुने कम्पनीले निर्धारित समय र प्रक्षेपित लागतमा गुणस्तरीय निर्माण सम्पन्न गरोस् भन्ने मेरो चाहना हो,’ उनले थपे । 

त्यसैगरी गोरूसिंगेदेखि चन्द्रौटासम्मको १९ किमी सडकको विस्तृत डिजाइन शीघ्र सम्पन्न गरी निर्माण कार्य आरम्भ गर्नसमेत नेता पौडेलले माग गरेका छन् । विस २०२० को समयमा पूर्वपश्चिम राजमार्ग विस्तार गर्दा तत्कालीन राजा महेन्द्र शाहले भारत, रुस र बेलायतको सहयोग मागेका थिए । सडकका डिभाइडर पनि बेलायती मोडलकै थिए । महेन्द्रले नवलपरासीको गैंडाकोटमा राजमार्गको शिलान्यास गरेपछि ‘महेन्द्र राजमार्ग’ नामकरण गरिएको थियो । देशमा गणतन्त्र आएपछि राजमार्गको ‘महेन्द्र’ नाम हटाएर ‘पूर्वपश्चिम’ राजमार्ग कायम गरिएको छ ।