‘सकम्बरी’ गीतबाट मोडलिङमा प्रवेश गरेकी मोडल हुन् कुसुम शर्मा । ‘डेब्यू’ कामबाटै दर्शकको नजरमा परेकी यी सुन्दरी मोडलले त्यसयता थुप्रै भिडियोमा आफ्नो कला र सौन्दर्य देखाइसकेकी छिन् ।

हिजोआज पनि उनले मोडलिङ गरेका म्युजिक भिडियोहरू सार्वजनिक हुने क्रम जारी छ । मोडलिङकै कामका कारण उनले चलचित्रमा समेत फड्को मार्न थालेकी छिन् । उनै कुसुमसँग लोकान्तरले आफ्नो अनुभव, सफलता र आगामी यात्राबारे कुराकानी गरेको छः  

मोडलिङ यात्रा कस्तो भइरहेको छ ? 
एकदमै राम्रो भइरहेको छ । एकपछि अर्को भिडियो आइरहेका छन् । दर्शकहरूले पनि माया गरिदिनुभएको छ ।

अहिलेसम्म कतिवटा म्युजिक भिडियोमा काम गर्नुभयो ? 
मोडलिङ यात्रा शुरू गरेको धेरै भएको छैन । यद्यपि, धेरै काम गरिसकेकी छु । डेढ दर्जनभन्दा बढी भिडियो रिलिज भइसकेका छन् । केही रिलिजको तयारीमा छन् । केही भिडियो रिलिज नै भएनन् । 

आफूले काम गरेका भिडियोलाई दर्शकले रुचाउँदा कस्तो लाग्छ ? 
एकदमै खुशी लाग्छ । अझै राम्रो काम गर्न पाउँ भन्ने हुन्छ । यो माया र विश्वासलाई कसरी जोगाइराख्ने भन्ने पनि दबाब हुन्छ । 

तपाईंका जति गीत आए, तीमध्ये धेरै चर्चा चाहिँ प्रकाश सपुतसँगका गीतलाई लिएर भयो । अरू गीतको चर्चा त्यति नहुनुको कारण के हो जस्तो लाग्छ ?

प्रकाश सर (सपुत) आफैँमा एउटा ब्रान्ड हो । उहाँका सबैजसो गीतले चर्चा पाउँछन् । सोहीकारण उहाँको प्रोजेक्टमा म नभएर अरू कोही जोडिएको भए पनि चर्चा हुन्थ्यो । मेरा अरू गीतको पनि चर्चा हुँदै नभएको होइन । गीतले प्रोडक्सन अनुसारको चर्चा पाइरहेका छन् । मेरा अरू भिडियोलाई प्रकाश सरसँग जोडिएका गीतसँग तुलना गर्न मिल्दैछ । 

‘मुटु कटक्कै’ गीत चलेपछि ‘कुसुमलाई चल्न प्रकाश सपुतको सहारा’ भन्ने खालका गसिपहरू आइरहेका थिए । त्यस्ता गसिप देख्दा कस्तो लाग्छ ? 

हुन त चर्चित व्यक्तिहरूकै धेरै समाचार बन्छन् । यद्यपि, त्यही कुरालाई सकारात्मक तरिकाले पनि पेश गर्न सकिन्छ जस्तो लाग्छ । मैले उक्त कुरालाई नकारात्मक तरिकाले चाहिँ हेरेकी छैन । ममा केही छ र त मेरो बारेमा गसिप बन्छ । समाचार बन्छ । ‘ए, मेरो पनि न्युज बन्ने बेला भएछ । तैँले अझै राम्रो काम गर्नुपर्छ’ भन्ने फिल हुन्छ । 

पहिलो काम नै अत्यधिक हिट भयो । त्यसले अगाडिका दिनमा दबाब महसुस चाहिँ कत्तिको भयो ? 

एकदमै हुन्छ । मैले पहिलो काममै नसोचेको सफलता पाएको हो । यो कुरालाई मैले मजाकका रूपमा लिनुहुन्न । चर्चामा आइसकेपछि हराऊँ जस्तो कसैलाई पनि हुँदैन । मैले के गर्दा राम्रो हुन्छ ? दर्शकको मायालाई मैले कसरी जोगाइराख्न सक्छु ? कसरी राम्रो काम गर्न सक्छु ? भन्नेजस्ता कुराले धेरै प्रेसर दिँदोरहेछ । ला ! म डाउन–डाउन हुँदै जाने हो कि भन्ने लाग्दोरहेछ । विस्तारै–विस्तारै चर्चा पाउँदै जानु राम्रो हुन्छ । एकैपटक माथि पुगेर तल झर्दा नमज्जा हुन्छ । यस्तै कुराहरूले गर्दा अत्तिनै ‘प्रेसर फिल’ हुँदोरहेछ । 

चलचित्र ‘सञ्जीवनी’मा काम गर्ने तय भएको केही समय भिडियोमा काम गर्नुभएन । त्यतिबेला केही बन्धन थियो ? 

संगीत क्षेत्रमा आएँ । शुरूमै राम्रो भयो । सबैले माया गरिदिनुभयो । लगत्तै चलचित्रबाट अफर आयो । मेरा लागि यो पनि नसोचेको र ठूलो कुरा थियो । एउटा भिडियो खेलेर चलचित्र आयो भन्दा दर्शकहरू पनि उत्साहित हुन्छन् । सोहीकारण एकछिन भिडियो नगर्ने भन्ने सम्झौता थियो । चलचित्रको छायांकन शुरू हुन केही समय लाग्ने भयो । पछि सोच्यौं – एउटै काममा दर्शकले विश्वास गरिरहन्छन् भन्ने हुँदैन । सधैँ ‘लकले फेबर’ गरिरहेको हुँदैन । मेरो कामहरू आइरहेनन् र दर्शकले चिनेनन् भने म हराउँदै जान सक्छु । काम गरेपछि दर्शकले चिनिरहन्छन् । क्यामेरा फेस गरिरहँदा केही कुरा भए पनि सिकिन्छ भन्ने भएपछि आएका म्युजिक भिडियो गर्न थालेँ । 

कलाकारितामा करिअर शुरू गरेको एक वर्ष पनि भएको छैन । यो समयमा कुनै दिन अब यो क्षेत्रमा काम गर्दिनँ भन्ने दिमागमा आयो कि आएन ?

आएको थियो नि । त्यही भएर फेसबूकमा पोस्ट पनि गरेकी थिएँ । मलाई बीचमा एकदमै प्रेसर फिल भएको थियो । मानिसहरूले प्रकाश सपुतबिना कुसुम शर्मा केही पनि होइन । ‘फ्लप मोडल’ जस्ता आशयका कुराहरू आउँदा, ड्रेसको सानो विषयमा समेत कन्ट्रोभर्सी बनाइदिँदा प्रेसर फिल गरेकी थिएँ । म सँग कलाकारिता मात्र होइन, मेरो हातमा नर्सिङको अर्को ‘पावरफूल वे’ पनि छ । यो कलाकार मात्र होइन, नर्स पनि हो भनेर प्रमाणित गर्छु भन्ने लागेको थियो । यद्यपि, फेरि मानिसहरूले जे भने पनि हरेस खानुहुन्न । त्यस्तो भन्नेहरूलाई यही क्षेत्रमा केही गरेर सक्षम हो भनेर प्रमाणित गर्नुपर्छ भन्ने लाग्यो । कुसुम तँ लुजर होइन भन्ने खालको फिल भयो । 

प्रेसर महसुस गरिरहेको समयमा त्यो आँट चाहिँ कसरी आयो ? 

मेरो इन्स्पिरेशन प्रकाश सर हो । उहाँले मलाई मोडलिङमा डेब्यु गराउने मात्र नभएर मलाई सधैं हौसला दिने गर्नुभएको छ । 

मानिसहरूले राम्रो काममा पनि खोट लगाउँछन्, त्यस्तो कुराहरूलाई धेरै मनमा लिनुहुन्न । राम्रो गर्दै जानुपर्छ भनेर सम्झाउनुहुन्थ्यो । तिमी तिम्रोमात्र नभएर अरूको पनि खुशी हो भनेर सोँच्नुपर्छ भन्नुहुन्थ्यो । काम गर्दिनँ भन्ने होइन, अझ राम्रो काम गरेर अगाडि बढ्छु भन्ने मनमा लिनुपर्छ भन्नुहुन्थ्यो । मैले सामाजिक सञ्जालमा केही निराशाजनक खालको पोस्ट गर्दा प्रकाश सरले आफै टेक्ट वा फोन गर्नुहुन्छ । कहिले भेटेरै पनि सम्झाउनुहुन्छ । उहाँले जहिले ‘इन्स्पायर’ गर्नुहुन्छ अनि म आफूलाई अझै स्ट्रोङ फिल गर्छु । 

चलचित्र घोषणा भएको धेरै भयो । छायांकन शुरू हुन किन ढिला भइरहेको छ ?

चलचित्र विदेशमा छायांकन हुने हो । त्यसका लागि म एक जनाको भिसा लागेर हुँदैन, सबैको लाग्नुपर्यो । सबै टिमको प्रक्रिया पूरा गर्दा ढिला हुनु स्वाभाविक हो । त्यसमाथि चलचित्रका लागि म आफूमा पनि केही निखार आउनुपर्यो । वर्कसपहरू गरिरहेको छु । सम्भवतः अबको दुई महिनामा सेटमा गइसक्छौं । 

चलचित्रमा अभिनयको अफर आउँदाको शुरूवाती अनुभूति कस्तो थियो ? 

निर्देशक दिनेश सरबाट फोन आयो । तर, मैले शुरूमै निर्णय दिइनँ । प्रकाश सपुत इज माइ गडफादर, के गर्ने भनेर उहाँलाई सुनाएँ । सबैको सल्लाह लगेँ, स्क्रिप्ट पढेँ । अनि बल्ल अभिनय गर्ने डिसिजन लिएँ । चलचित्रबाट अफर आउँदा एकदमै खुशी थिएँ । मेरो सानैदेखिको सपना पर्दामा देखिनु थियो । म नृत्यमा पर्फेक्ट छैन । यद्यपि, एक्ट चाहिँ गर्न सक्छु भन्ने विश्वास थियो । भिडियोमा करिअर शुरू गर्नेवित्तिकै चलचित्रबाट अफर आउँदाको खुशी त कति कति । त्यसमाथि बच्चैदेखि हेर्दै आएको अभिनेता आर्यन सिग्देलसँग काम गर्नेभन्दा अझ खुशी भएँ । 

डेढ दर्जनभन्दा बढी भिडियोमा काम गर्नुभयो । तर, अहिले पनि तपाईको वास्तविक नामभन्दा पहिलो भिडियो ‘सकम्बरी’को नामले चिन्नेहरू धेरै हुनुहुन्छ । यसरी दर्शकमाझ चिनिँदा कस्तो लाग्छ ? 

खुशी लाग्छ । प्राउड फिल हुन्छ । निक नेम भन्ने कुरा यत्तिकै पाइँदैन । आफूले गरेको कामलाई माया गरेर धेरै मानिसहरूले सोही नामले चिन्छन् भने त्यो त उहाँहरूको माया हो । मलाई चिन्ने मेरो पहिचान पनि हो भन्छु । एउटा कलाकारको लागि दर्शकहरूले दिएको नामभन्दा प्यारो अरू नाम हुँदैन जस्तो लाग्छ । शुरूको प्रोजेक्टमाभन्दा राम्रो गरौं भन्ने सधैं हुन्छ, तर शुरूमा मलाई जे भनेर चिन्नुभयो, त्यसमा खुशी छु । 

चलचित्रसम्मको यात्रा तय गर्दै हुनुहुन्छ । अभिनय प्रशिक्षण लिनुभयो कि तयारी गर्दै हुनुहुन्छ ? 

सोँच त पहिल्यैबाट हो । तर, समय नमिल्दा सिक्न पाएकी छैन । मैले अघि पनि भनेँ, मलाई राम्ररी नाँच्न आउँदैन । मैले डान्स सिक्नुपर्छ । फिगर, फेसलाई पनि मेन्टेन गर्नुपर्छ । मलाई थिएटर ज्वाइन गर्न मन छ । विस्तारै आवश्यक कुराहरू सिक्दै, कमी कमजोरी सुधार्दै जानेछु । 

भिडियोमा धेरै मोडलहरूसँग सहकार्य गर्नुभयो । अब, कोसँग देखिन मन छ ? 

चलचित्रको हिरोसँग काम गर्ने मन छ । पल शाह, आकाश श्रेष्ठलगायतसँग एकपटक भिडियोमा आफूलाई हेर्ने रहर छ ।