‘लोकान्तर राउण्ड अप’मा पाठकवृन्दलाई स्वागत छ । सधैँझैँ आज पनि हामी बितेको २४ घण्टाका मुख्यमुख्य घटनाक्रमसहित उपस्थित भएका छौँ–
००००
काठमाडौं महानगरपालिकाका प्रमुख बालेन्द्र (बालेन)साहले महानगरका शिक्षा विभाग प्रमुख सीताराम कोइरालालाई स्पष्टीकरण सोधेका छन् ।

नगर शिक्षा समितिको निर्णय नभए पनि मध्यबानेश्वरस्थित रत्नराज्य स्कूललाई विज्ञान संकायतर्फ कक्षा ११ सञ्चालन गर्न अनुमति दिएको पाइएपछि बालेनले स्पष्टीकरण सोधेका हुन् ।

महानगर प्रमुख बालेनका स्वकीय सचिव भूपदेव साहका अनुसार गत शुक्रवार स्पष्टीकरण सोधिएको हो । यसअघि कर्मचारी नियुक्ति प्रक्रियामा गोलमाल गरेको पाइएपछि बालेन तत्कालीन प्रमुख प्रशासकीय अधिकृतसहितका कर्मचारीमाथि एक्सन लिएका थिए । 
००००
नेकपा एमालेका अध्यक्ष एवं पूर्वप्रधानमन्त्री केपी शर्मा ओलीले एसिडपीडितको पीडा सबैको साझा पीडा भएको बताएका छन् । 

आइतबार एसिड आक्रमणबाट पीडित किशोरीको पीडा र जीवन कथालाई समेटेर निर्माण हुन लागेको चलचित्र ‘नमेटिने घाउ’ को शुभमुहूर्त कार्यक्रममा अध्यक्ष  ओलीले नेपाललाई एसिड आक्रमणरहित देश बनाउनुपर्नेमा जोड दिए ।

यसैबीच ओलीले सो चलचित्रमा अभिनय गर्ने भएका छन् । आइतवार काठमाडौंको नयाँ बानेश्वरमा फिल्मको औपचारिक घोषणा कार्यक्रममा ओलीले प्रधानमन्त्रीको भूमिका निर्वाह गर्ने जानकारी दिइएको हो ।
००००
कोशी प्रदेश सरकारको आइतबार बसेको मन्त्रिपरिषद् बैठकले प्रदेश लगानी प्राधिकरणको प्रमुख कार्यकारी निर्देशक सरोज कोइरालालाई थप एक कार्यकालका लागि पुनः नियुक्त  गर्ने निर्णय गरेको छ ।

 बैठकले मे २९ का दिन ‘सगरमाथा दिवस’ मनाउने निर्णय गरेको पर्यटन, वन तथा वातावरणमन्त्री गणेश उप्रेतीले जानकारी दिए ।
००००

प्रधानमन्त्री पुष्पकमल दाहाल ‘प्रचण्ड’ले संघीयता कार्यान्वयनका लागि आधारभूत संरचना तयार भए पनि अझै केही कानुनहरू परिमार्जन र निर्माण गर्न बाँकी रहेको बताएका छन् ।

सिंहदरबारमा आइतबार आयोजित कार्य विस्तृतीकरण परिमार्जनको मस्यौदा प्रतिवेदन माथिको छलफलमा प्रधानमन्त्रीले जनप्रतिनिधिहरू निर्वाचित भएर पनि एक कार्यकाल सम्पन्न भइसकेको अवस्थामा भोगाइका क्रममा थुप्रै ठाउँमा अस्पष्टता देखिएको बताएका हुन् ।
००००
प्रहरी समायोजन भए पनि प्रहरीको पोशाक र दज्र्यानी चिह्न भने नफेरिने भएको छ । 
प्रधानमन्त्री पुष्पकमल दाहाल ‘प्रचण्ड’ले १५ दिनभित्र प्रहरी समायोजन गर्न निर्देशन दिएपछि आइतबार गृह मन्त्रालयमा विषयगत समितिको बैठक बसेको थियो । 

उपप्रधान तथा गृहमन्त्री नारायणकाजी श्रेष्ठ तथा ७ वटा प्रेदशका आन्तरिक मामिला तथा कानून मन्त्रीसहितको बैठकमा यस्तो सहमति जुटेको गृह मन्त्रालयका प्रवक्ता नारायणप्रसाद भट्टराईले बताए ।
००००
निर्वाचन आयोगले यही माघ ११ गते सम्पन्न भएको राष्ट्रिय सभाको निर्वाचन परिणामसहितको प्रतिवेदन राष्ट्रपति रामचन्द्र पौडेलसमक्ष पेश गरेको छ ।

आगामी फागुन २१ गतेदेखि रिक्त हुने १९ सदस्यका लागि सात प्रदेशमा निर्वाचन भएको थियो । राष्ट्रपति भवन शीतल निवासमा आइतबार आयोजित कार्यक्रममा राष्ट्रपति पौडेललाई प्रमुख निर्वाचन आयुक्त दिनेशकुमार थपलियाले सो प्रतिवेदन बुझाएका हुन् ।
००००
नेपाली कांग्रेसका महामन्त्री गगन थापाले शुरू गरेको संवाद यात्रा मोरङमा आइपुगेको छ । शनिबार झापादेखि शुरू भएको यात्रा आइतवार मोरङमा आइपुगेको हो । 

मोरङको पुरानो सदरमुकाम रंगेलीदेखि शुरू भएको यात्रा कटहरी विराटनगर हुँदै सुनसरी प्रवेश गर्ने नेताहरूले बताएका छन्  ।

आइतवार कटहरी चोकमा भएको संवादमा हुलाकी राजमार्गको ढिलाईले भोगेका समस्या, रेलको मुआब्जा, रोजगारीको सिर्जना, स्वास्थ्य बीमाका कारण जनताले भोग्नु परेका समस्यालगायतका विषयमा कार्यकर्ताहरूले महामन्त्री थापाको ध्यानाकर्षण गराएका थिए ।
००००
गत साता निरन्तर ओरालो देखिएको नेपाल स्टक एक्सचेञ्ज परिसूचकमा यो सातामा कारोबारको पहिलो दिन भने दोहोरो अंकको सुधार देखिएको छ ।
आइतबार नेप्से परिसूचक १० दशमलव  ३७ अंकले बढेर दुई हजार ९४ दशमलव  ४६ को विन्दुमा कायम भएको हो ।
००००
नेपाली कांग्रेसले ‘समुदायमा कांग्रेस’ अभियानलाई झनै प्रभावकारी बनाउन नेताहरूलाई जिल्ला–जिल्लामा खटाउने निर्णय गरेको छ । 

केन्द्रीय कार्यसमितिको निर्णय बमोजिम प्रारम्भ भएको अभियानअन्तर्गत कांग्रेसले फरक जिल्लामा खटिने फरक टोली तोकेको पार्टी कार्यालयका मुख्य सचिव कृष्णप्रसाद पौडेलले जानकारी दिए ।
००००
उपप्रधान एवम् गृहमन्त्री नारायणकाजी श्रेष्ठलाई  प्रदेशका आन्तरिक मामिला तथा कानुन मन्त्रीहरूले प्रमुख जिल्ला अधिकारीलाई पनि प्रदेशको संरचनामा राख्न सुझाव दिएका छन् । गृहमन्त्रालयमा आयोजित प्रहरी समायोजनबारे छलफल गर्दै प्रदेश मन्त्रीहरूले सो सुझाव दिएका हुन् ।
००००
विधान संशोधनका लागि नेकपा एकीकृत समाजवादीको दोस्रो केन्द्रीय परिषद् बैठक काठमाडौँमा सुरु भएको छ । कमलादीस्थित प्रज्ञा प्रतिष्ठानमा सुरु भएको बैठकमा सो पार्टीको अन्तरिम विधान २०७८ मा जिल्ला तहबाट समेत आएका सुझावसहितको प्रस्तावित संशोधनको मस्यौदा पेश गरिएको छ ।