‘कट्टा हान्दिन्छु’ शीर्षकमा एक सातामै दुई वटा गीत सार्वजनिक भएका छन् । ​

एलिना चौहान र खेम सेञ्चुरीको स्वरमा रहेको गीत सार्वजनिक भएको एक सातामै विश्वराम कार्कीको स्वरमा सोही शीर्षकमा अर्को गीत सार्वजनिक भएको छ । 

१३ दिन अगाडि खेम र एलिनाको स्वरमा ‘कट्टा हान्दिन्छु’ बोलको गीत सार्वजनिक भएसँगै चर्चामा आयो । उक्त गीतले अहिले झन्डै ४१ लाख भ्युज पाइसकेको छ । अहिले पनि यो गीत युट्युबमा संगीततर्फ ट्रेन्डिङको पहिलो नम्बरमा छ । ​

ओबी रायमाझीको युट्युबमा रिलिज भएको म्युजिक भिडियोमा रायमाझीसँगै आश्मा विश्वकर्माको नृत्य छ । यसको नृत्यलाई लिएर पनि छुट्टै चर्चा भएको छ । एलिनासँगै खेमले स्वर दिएको गीतमा खेमकै संगीत छ भने गीतका रचनाकार नेत्र अर्याल हुन् । 

तीन दिन अगाडि मात्र युट्युबमा ‘कटटा हान्दिन्छु’ बोलमा अर्को गीत आएको छ । विश्वराम कार्कीको स्वरमा रहेको गीतमा कार्कीजी र मेगेन्द्र सुवेदीको शब्द तथा कार्कीजी कै संगीत छ । 

यसको भिडियोमा चर्चित द्धन्द्ध निर्देशक राजेन्द्र खड्गी र अभिनेता जयकिशन बस्नेतको अभिनय छ । साता दिनमा एउटै शीर्षकका दुई गीत आएपछि कसको कपी भन्ने चर्चा शुरू भएको छ । ​

रिलिजको समयलाई हेर्ने हो भने एलिनाको गीत अगाडि आएको देखिन्छ । तर, पछिल्लो रिलिज गीतका गायक विश्वराम कार्कीले एलिना र खेमको गीत भन्दा आफूले पहिले नै गीत तयार पारेर अडियो प्लेटफर्ममा सार्वजनिक गरेको दाबी गर्छन् ।

गीत रिलिज कार्यक्रममा अभिनेता जय किशन बस्नेतले पनि एलिना चौहानको ‘कट्टा हान्दिन्छु’ गीतमा आफूले चलचित्रमा बोल्ने गरेको संवादका शब्द बिना अनुमति प्रयोग गरिएको बताएका छन् । 

यो विषयमा एलिना चौहान केही बोलेकी छैनन् । उनले स्वर दिएको गीतका गीतकार नेत्र अर्याल, संगीतकार खेम सेञ्चुरी र मोडल ओबी रायमाझीले पनि आफ्नो धारणा सार्वजनिक गरेका छैनन् ।