सावित्रा भण्डारीको ह्याट्रिकसहित पाँच गोलको मद्दतले नेपालले वाफ वुमेन्स च्याम्पियनसिप २०२३ मा इराकलाई पराजित गरेको छ । साउदी अरेबियाको जेद्दामा बिहीबार भएको खेलमा नेपालले इराकलाई ५–० ले हराएको हो । 

सावित्राले पहिलो हाफमा चार र दोस्रो हाफमा एक गोल गरेकी हुन् । नेपालका लागि अन्तर्राष्ट्रिय फुटबलमा सावित्राले गरेको गोल संख्या कीर्तिमान ५० पुगेको छ । 

नेपालका लागि उनको यो कीर्तिमान पाँचौं ह्याट्रिक पनि हो । सावित्राले नेपालका लागि अहिलेसम्म खेलेका खेलमध्ये २५ मा गोल गरेकी छिन् ।

नेपालले यसअघि पहिलो खेलमा सिरियालाई ४–१ ले हराएको थियो । दुई जितसँगै नेपालको दुई खेलबाट ६ अंक भएको छ । 

नेपालले अब शनिबार समूह चरणको अन्तिम खेलमा प्यालेस्टाइनसँग खेल्ने छ ।