काठमाडौं, २६ वैशाख–गैरकानूनी रूपमा चुरोट उत्पादन गर्दै आएको सूर्य टोबाकोलाई स्वास्थ्य तथा जनसंख्या मन्त्रालयले सुर्तीजन्य पदार्थ नियन्त्रण तथा नियमन निर्देशिका– २०७१ तत्काल कार्यान्वयन गर्न निर्देशन दिँदै पत्र काटेको छ ।

सुर्तीजन्य पदार्थको बट्टा तथा प्याकेटमा ९० प्रतिशतचेतावनीमूलक सन्देश र चित्र छाप्नुपर्ने कानूनी व्यवस्थालाई सूर्य टोबाकोले बेवास्ता गर्दै आएको थियो ।

सोमबार स्वास्थ्य मन्त्रालयमा बसेको सचिवस्तरीय बैठकको निर्णयअनुसार मंगलवार स्वास्थ्य मन्त्रालय कानून शाखाका उपसचिव शम्भुराज रेग्मीले सूर्य टोबाकोलाई पत्र काटेका छन् ।

सुर्तिजन्य पदार्थ नियन्त्रण तथा नियमन ऐन र नियमावलीअनुसार चुरोटका बट्टा तथा प्याकेटमा अनिवार्यरूपमा ९० प्रतिशत चेतावनीमूलक सन्देश र घातक चित्र छाप्नुपर्ने व्यवस्था भए पनि सूर्य टोबाको कम्पनीले तीन वर्षदेखि कानूनलाई अटेर गर्दै आएको छ ।

सूर्य टोबाकोले कानुन अटेर गर्दै नियमविपरीत चुरोट उत्पादन गर्दै आएको विषयमा यसअघि लोकान्तरले समाचार प्रकाशित गरेको थियो ।

सञ्चार माध्यमहरूमा सूर्य टोबाकोले कानुनलाई अटेर गर्दै चुरोट उत्पादन गर्दा पनि स्वास्थ्य मन्त्रालयले साचो नदिएको समाचारहरू बाहिर आउन थालेपछि स्वास्थ्य मन्त्रालयले उक्त कम्पनीलाई कानूनको दायरामा ल्याउन पहल थालेको हो ।

स्वास्थ्य राज्यमन्त्री पद्या अर्यालले गत साता पत्रकार सम्मेलन गर्दै सूर्य टोबाको कम्पनीलाई एक साताभित्र निर्देशिका कार्यन्वयन गर्न लगाउने र नियम पालना नगरे कारबाही गर्ने बताएकी थिइन् । स्वास्थ्य राज्यमन्त्री पद्मा आर्यालको निर्देशन अनुरूप स्वास्थ्य मन्त्रालयले उक्त कम्पनीलाई कानुन अनुसार ९० प्रतिशत चेतावनीमूलक चित्र छाप्न भन्दै पत्र काटेको हो ।

मन्त्रालयले उक्त कम्पनीलाई पठाएको पत्रमा सूर्य टोबाकोलाई एक महिनाभित्र नियम कार्यन्वयन गरी मन्त्रालयमा जानकारी दिन आदेश दिएको छ ।

मानव स्वास्थ्यलाई गम्भीर असर पार्ने सुर्तीजन्य पदार्थको प्रयोगलाई निरुत्साहित गर्न भन्दै सरकारले सुर्तीजन्य पदार्थ नियन्त्रण तथा नियमन गर्ने ऐन २०६८ संशोधन गरी २०७१ सालमा सुर्तीजन्य पदार्थ नियन्त्रण तथा नियमन गर्ने निर्देशिका बनेको थियो ।

निर्देशिकामा सुर्तीजन्य पदार्थको बट्टा, प्याकेट, र्‍यापर्स, पेटी तथा पार्सल प्याकेजिङमा ९० प्रतिशत चेतावनीमूलक सन्देश र चित्र छाप्नुपर्ने तथा अंकित गर्नुपर्ने व्यवस्था गरियो । २०७१ को निर्देशिकामा चेतावनीमूलक सन्देश छाप्नुपर्ने व्यवस्था परिमार्जन गरी ७५ प्रतिशतबाट बढाएर ९० प्रतिशत पुर्‍याइएको थियो ।

निर्देशिका अनरूप सुर्ती उद्योगहरुले २०७२ जेठ १ गतेदेखि बजारमा पठाउने सुर्तीजन्य पदार्थको प्याकेटमा ९० प्रतिशत चेतावनीमूलक चित्र अंकित सन्देश हुनुपर्ने व्यवस्था छ ।

उक्त नियमलाई सूर्य टोबाको कम्पनीले नटेरेपछि स्वास्थ्य मन्त्रालयले यसअघि पनि कम्पनीको नामै तोकेर नियम पालना गर्न निर्देशन दिएको थियो ।

करीब ८० प्रतिशत चुरोटको बजार ओगटेको सूर्य टोबाकोले आफूले उत्पादन गर्ने सूर्य चुरोटको बट्टामा ९० प्रतिशत चेतावनीमूलक सन्देशसहितको रंगित चित्र अंकित नगरेरै आफ्ना उत्पादनहरू बजारमा पठाइरहेको छ ।

हेर्नुहोस् पत्र :