शुभ मंगल ज्यादा सावधान समलैंगिक सम्बन्धलाई सहानुभूतिपूर्ण तरिकाले देखाउने दुर्लभ हिन्दी फिल्म हो । समलिंगी सम्बन्धलाई फायर, कपूर यान्ड सन्स, माई ब्रदर निखिल, अलीगढ र एक लडकी को देखा तो ऐसा लगा लगायतका फिल्ममा संवेदनशीलताका साथ देखाइएको छ ।  

यसमा फिल्ममा समलिंगी पात्रहरूमा कुनै अपराधबोध छैन । फिल्ममा उत्पन्न व्यंग्य मुख्य कलाकारहरूलाई सहकलाकारबाट आउने प्रतिक्रियामा भेटिन्छ । 

आयुष्मान खुरानाका फिल्महरू हिट हुनुमा युवाहरूप्रति उनको लगाव नै प्रमुख कारण हो । त्यस लगावलाई उनले नयाँ फिल्ममा झनै सशक्त रूपमा पस्किएका छन् । 

फिल्मको कथा कार्तिक र अमनको प्रेम वरिपरि घुम्छ । यी दुईजनाको प्रेम सार्वजनिक भएपछि परिवारमा मच्चिएको हंगामा नै कथाको केन्द्रविन्दु हो । 

निर्देशक हितेश केवल्यले फिल्मका हरेक पात्रलाई कथामा महत्त्व दिने हिसाबमा लेखेका छन् । तर फिल्मको पटकथा अझै राम्रो भएको भए अनि यसको सम्पादन चुस्त भएको भए यो एक कालजयी फिल्म बन्न सक्थ्यो । 

तैपनि आयुष्मान र उनका जितेन्द्रले फिल्ममा पूरा मेहनत गरेका छन् । जितेन्द्रले फिल्ममा आयुष्मानलाई पछि पारेका छन् । अनेकौं दृश्यमा उनी हावी भएका छन् । 

फिल्ममा गजराज राव र नीना गुप्ताको जोडीले अघिल्लो फिल्म बधाई होको केमिस्ट्रीलाई अघि बढाउने कोशिश गरेका छन् तर गजराजले अलिक लाउड अभिनय गरेकाले अघिल्लो फिल्मको जस्तो मज्जा आउँदैन । काकाकाकीको भूमिकामा मनुऋषि र सुनीताको जोडी गजराज र नीनाको भन्दा राम्रो जमेको छ । अनि मानवी घघरु र पंखुडी अवस्थीले पनि आफ्नो भूमिकाले दर्शकलाई प्रभावित पारेका छन् ।

फिल्मले हसाउने कोशिश त गर्छ तर तमाम जोकका बावजूद फिल्मले दर्शकमा अमिट छाप छोड्न सक्दैन । आयुष्मानका पछिल्ला फिल्महरूमा कन्टेन्ट बलिया त थिए नै अनि उनको ब्रान्ड भ्याल्यु पनि बढेको थियो तर उनले अब सतर्क हुन जरूरी छ । नयाँ बाटो बनाउने धुनमा उनले बाटो नै बिराउने सम्भावना रहेकाले उनी सचेत हुन जरूरी छ ।

फिल्म : शुभ मंगल ज्यादा सावधान
कलाकार : आयुष्मान खुराना, जितेन्द्र कुमार, गजराज राव, नीना गुप्ता, मनुऋषि चड्डा, सुनीता, मानवी आदि 
निर्देशक : हितेश केवल्य
रेटिङ :३/५

अमर उजालामा प्रकाशित पंकज शुक्लको समीक्षा