कोरोना भाइरस संक्रमण उपत्यकामा फैलिएपछि उपत्यकाका ३ वटा जिल्लाका प्रमुख जिल्ला अधिकारीको संयुक्त बैठकले बुधवार राति १२ बजेदेखि निषेधाज्ञा जारी गरेका छन् ।

पछिल्लो समयमा उपत्यकाका महाबौद्ध, न्यूरोड, असन, बानेश्वर, घट्टेकुलो लगायतका ठाउँमा कोरोना भाइरसको संक्रमण देखिएपछि उपत्यकामा निषेधाज्ञा लागू गर्ने निर्णय गरिएको थियो ।

निषेधाज्ञाको बिहीवार पहिलो दिन उपत्यका सबैजसो ठाउँ सुनसान देखिए । अत्यावश्यक सवारीसाधनबाहेक अन्य कुनै पनि सवारीसाधन चलेका छैनन् भने मानिसको आवतजावत ठप्प जस्तै छ ।

सडकमा प्रहरीहरू तैनाथ गरिएका छन् । प्रहरीले एम्बुलेन्स, खाद्यान्न ढुवानी गर्ने गाडी, पत्रकारका सवारीसाधनबाहेक अन्य सवारीसाधनलाई पूर्णरूपमा निषेध गरेको छ ।

निषेधाज्ञालाई अटेर गरेर बाहिर निस्केका सवारीसाधन तथा मोटरसाइकललाई ‘होल्ड सेन्टर’ स्थापना गरेर बिहानदेखि साँझसम्म राख्ने आदेश आएको बालाजुमा खटिएका एक प्रहरी जवानले लोकान्तरलाई जानकारी दिए ।

‘निषेधाज्ञा उल्लंघन गर्ने सवारीसाधनलाई साँझसम्म होल्ड गरेर राख्न आदेश आएको छ,’ ती प्रहरी जवानले भने ।

उपत्यकाका बालाजु, नारायणगोपाल चोक, ठमेल, सिंहदरबार गेट, दरबार मार्ग, माइतीघर, बानेश्वर लगायतका मुख्यचोकमा प्रहरीले चेकपोस्ट राखेर सवारीसाधन चेकजाँच गरिरहेको छ ।

दिउँसो २ बजेसम्म उपत्यकामा कसैले पनि निषेधाज्ञा उल्लंघन नगरेको महानगरीय प्रहरी परिसर काठमाडौंका प्रमुख वरिष्ठ प्रहरी उपरीक्षक (एसएसपी) श्याम ज्ञवालीले बताए ।

‘काठमाडौंमा हालसम्म कुनै त्यस्ता उल्लंघनका घटना भएका छैनन् । अवस्था सामान्य छ,’ एसएसपी ज्ञवालीले लोकान्तरसँग भने ।

हेर्नुहोस् भिडियो -