गठन भएको ३ वर्ष पुग्न लाग्दा प्रदेश ५ ले आफ्नो नाम र राजधानीको टुंगो लगाएको छ ।

मंगलवार बसेको प्रदेश सभा बैठकले प्रदेशको नाम लुम्बिनी र राजधानी दाङको राप्ती उपत्यका (देउखुरी) रहने प्रस्ताव पारित गरेको हो । 

प्रदेश सभामा भएको मत विभाजनमा दाङको पक्षमा ६९ र विपक्षमा १३ मत परेका थिए । सत्तारुढ दल नेकपाले प्रस्तावको पक्षमा र कांग्रेसले विपक्षमा मत हाल्न ह्वीप जारी गरेका थिए ।

प्रतिपक्षी दल कुल मतभन्दा कम मत विपक्षमा परेकाले फ्लोर क्रस भएको देखिएको छ ।

प्रदेश सभामा सरकारका तर्फबाट आन्तरिक मामिला तथा कानूनमन्त्री कुलप्रसाद केसी सोनामले दाङको राप्ती गाउँपालिका, गढवा गाउँपालिका तथा अर्घाखाँची जिल्लाको शितगंगा नगरपालिकाले ओगटेको राप्ती नदी किनाराको मैदानी भाग राप्ती उपत्यका (देउखुरी)लाई प्रदेशको राजधानी तोक्ने प्रस्ताव गरेका थिए । यस्तै प्रदेशको नाम लुम्बिनी रहने उनको प्रस्ताव थियो ।

प्रस्ताव पारित भएपनि भौतिक संरचना निर्माण नहुँदासम्म प्रदेशको राजधानी बुटवल नै कायम रहनेछ । 

शेरबहादुर देउवा नेतृत्वको तत्कालीन सरकारले २०७४ माघ ३ गते बुटवललाई प्रदेशको अस्थायी राजधानी तोकेको थियो । 

प्रदेश सभा बैठकमा प्रदेशको नामकरणसम्बन्धी प्रस्ताव पनि दुईतिहाइले पारित भएको हो ।

बैठकमा सरकारका तर्फबाट आन्तरिक मामिला तथा कानून मन्त्री कुलप्रसाद केसी सोनामले शान्तिका अग्रदुत गौतमबुद्धको जन्मस्थल लुम्बिनीको महत्त्वलाई हृदयंगम गर्दै साझा चिनारीको रूपमा प्रदेशको नाम लुम्बिनी राख्ने प्रस्ताव पेश गरेका थिए ।

उक्त प्रस्तावको पक्षमा ७९ र विपक्षमा ४ मत परेका थिए ।

प्रदेश सभा सदस्यहरू पुरमती ढेगा मगर, सहस्रराम यादव, विजय यादव र सुमन शर्मा रायमाझीले विपक्षमा मतदान गरेका हुन् ।