काठमाडौं महानगरपालिकाका मेयर बालेन्द्र साह र जनता समाजवादी पार्टीका संघीय परिषद् अध्यक्ष डा.बाबुराम भट्टराईबीच भेटवार्ता भएको छ । बालेन अध्यक्ष डा.भट्टराईलाई भेट्न शुक्रवार उनकै निवास टोखा पुगेका थिए । 

मेयर बालेनसँगको भेटको तस्बीर डा.भट्टराईले ट्वीटरमार्फत सार्वजनिक गरेका छन् । उनले मेयर बालेनसँग महानगरपालिकाको समस्या र योजनाबद्ध विकासबारे छलफल भएको जानकारी दिएका छन् । उनले बालेनलाई सफलताको शुभकामना पनि दिएका छन् । उनले ट्वीटरमा लेखेका छन्, ‘काठमाडौं महानगरपालिकाका मेयर बालेन साह र टिमसँग महानगरपालिकाका समस्या र योजनाबद्ध विकासवारे सार्थक विमर्श ! सफलताको हार्दिक शुभकामना !’ 

बालेन स्वतन्त्र उम्मेदवार भई काठमाडौंको मेयरमा निर्वाचित भएका थिए । मेयरमा निर्वाचित भएलगत्तै उनले सबैजसो प्रमुख राजनीतिक दलका शीर्ष नेताहरूसँग भेटवार्ता गरिसकेका छन् । मतगणनाको अन्तिम परिणाम सार्वजनिक नहुँदै उनी नेकपा एमालेका अध्यक्ष केपी ओलीलाई भेट्न बालकोट पुगेका थिए । शपथ लिएपछि उनले प्रधानमन्त्री तथा नेपाली कांग्रेसका सभापति शेरबहादुर देउवा, नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’लगायतसँग भेटवार्ता गरेका थिए । 

अन्य नेताहरूलाई निर्वाचन सकिएको केही समयमै भेटेका उनी जसपा अध्यक्ष डा.भट्टराईलाई भेट्न भने ढिलो गरी मात्र गएका हुन् । निर्वाचन सम्पन्न भएको २ महिना बित्न लाग्दा भट्टराईलाई भेट्न बालेन उनकै निवास पुगेका हुन् ।