बलिवुड अभिनेता आमिर खानको प्रतिक्षित फिल्म ‘लालसिंह चड्डा’ ओटीटी प्लेटफर्ममा पनि उपलब्ध हुने भएको छ । 

आगामी अगष्ट ११ मा हलमा रिलिज हुन लागेको ‘लालसिंह चड्डा’ त्यसको दुई महिनापछि ओटीटी प्लेटफर्ममा पनि उपलब्ध हुन लागेको हो । निर्माण पक्षले हलमा प्रदर्शन भएको दुई महिनापछि ‘लालसिंह चड्डा’लाई ओटीटी प्लेटफर्ममा पनि रिलिज गर्ने निर्णय गरेको ‘आजतक’ले जनाएको छ । यद्यपि, कुन प्लेटफर्म मार्फत् फिल्म रिलिज गर्ने भन्ने टुंगो भने नलागेको समाचारमा उल्लेख छ । ​

बलिवुडमा ‘मिस्टर पर्फेक्ट्सनिस्ट’को उपमा पाएका आमिर खान अभिनित फिल्म चारवर्ष पनि रिलिज हुन लागेको हो । यो फिल्मलाई लिएर आमिर धेरै आशावादी रहेको बताइन्छ ।

फिल्ममा आमिर र करिना कपुर मुख्य भूमिकामा रहेका छन् । त्यस्तै, फिल्ममा मोना सिंह, नागा चैतन्य, नेगर खानको अभिनय रहेको छ । फिल्ममा शाहरुख खान पनि क्यामियो रोलमा देखिएका छन् ।

यो फिल्म अमेरिकी चर्चित फिल्म ‘फोरेस्ट गम्प’को आधिकारिक रिमेक हो । फिल्मको पटकथालाई अतुल कुल्कर्नीले लेखेका छन् भने फिल्मको निर्देशन अद्भैत चन्दनले गरेका छन् ।