चलचित्र ‘आँधी तुफान २’ ले साउन २० गते अर्थात आजका लागि प्रदर्शन मिति तोकेर प्रचारप्रसार थालनी गरेको थियो । जसअनुसार चलचित्र शुक्रवारदेखि प्रदर्शनमा आउनुपर्ने हो । तर, कुनै पनि हलमा चलचित्र प्रदर्शनमा आएको छैन । 

लेखक एवं निर्माता मौनता श्रेष्ठ प्रचारप्रसारको कमी महसुस गर्दै चलचित्रको प्रदर्शन स्थगित गरिएको जानकारी दिए । ‘बर्खा पनि भयो । हामीले चलचित्रको राम्रो प्रचारप्रसार पनि गर्न नसकेको महसुस भयो’ श्रेष्ठले लोकान्तरसँग भने, ‘सोही कारण आजदेखि चलचित्र प्रदर्शनमा नल्याएका हौँ । छिट्टै कार्यक्रम गरी नयाँ प्रदर्शन मितिबारे जानकारी दिनेछौँ ।’ 

अहिलेका लागि प्रचारप्रसार बिना आफूहरूले ‘रिस्क’ लिन नचाहेको उनले प्रष्ट्याए । ‘चलचित्र नचलुञ्जेलसम्म मात्र आफ्नो हो । चलेपछि सकिहाल्छ’ उनले भने ‘अहिले चलचित्रहरू राम्रो चलिरहेका पनि छैनन् । हामीले पनि अहिले जोखिम नमोलौँ भनेर प्रदर्शन स्थगित गरेका हौँ ।’ उनले अब चलचित्र मंसिरमा आउने सम्भावना रहेको जानकारी दिए । प्रचार–प्रसारमा विशेष ध्यान दिँदै नयाँ मितिमा चलचित्र प्रदर्शनमा ल्याइने उनले बताए । 

मदन घिमिरेको निर्देशन रहेको ‘आँधी तूफान २’ नारीप्रधान चलचित्र हो । लेडिज एक्सन चलचित्रले चेलीबेटी बेचविखनको कथा पेश गर्छ । चलचित्रमा रवी गिरी, संजय खतिवडा, पुष्कर राउत, सोनी बिसी, याङ्सु श्रेष्ठ, आरती आचार्य, कान्जी कोइराला, ऋचा थापा, अनामिका कार्कीलगायतको अभिनय छ । एक दशकअघिको सफल चलचित्र ‘आँधी तूफान’को सिक्वेलको रूपमा ‘आँधी तूफान २’ निर्माण गरिएको होे ।