एसीसी प्रिमियर कप अन्तर्गत कीर्तिपुर मैदानमा भइरहेको नेपाल र कुवेतको सेमिफाइनल खेल वर्षाले रोकिएको छ । टस हारेर पहिले ब्याटिङमा उत्रिएको नेपालले २३.२ ओभरमा ३ विकेट गुमाएर १४१ रन बनाएपछि वर्षाले खेल रोकिएको हो । 

खेल रोकिँदा नेपालका लागि कप्तान रोहित पौडेलले ४० बलमा ३०  र कुशल मल्ल ३० बलमा ३२ रन बनाएर खेलिरहेका छन् । 

कुशल भुर्तेलले ४३ र आशिफ शेख ३१ रन बनाएर आउट भए ।  

अब निरन्तर वर्षा भइरहेर खेल हुनै नसक्ने अवस्था आए नेपाल सोझै फाइनलमा पुग्नेछ । किनकी नेपाल प्रिमियर कप अन्तर्गत समूह ए को विजेता हो ।

अब खेल नै नहुने अवस्था आयो भने यही समूह विजेताको आधारमा नेपाल फाइनलमा पुग्नेछ । यद्यपी बेलुकासम्ममा खेल्ने समय बाँकी भयो र सुपर ओभर खेलाउने २० मिनेटको समय बाँकी हुँदा पनि खेलबाटै निर्णय लिइने छ ।

खेल नभइ रद्द हुँदाको फाइदा भने नेपालले उठाउनेछ । 

फाइनलका लागि भने एक दिन रिजर्भ डे राखिएको छ । रिजर्भ डेमा पनि फाइनल खेल वर्षाले पूरै बिथोले वरियतामा अगाडि रहेको आधारमा नेपाल यो प्रतियोगिताको विजेता बन्दै एसिया कपमा छानिनेछ । 

यद्यपी वर्षा राेकिएर खेल हुने परिस्थिति बन्दैछ ।