नेपाल चलचित्र संघ र निर्माता संघबीच सेयर बाँडफाँडको विषयमा सहमति जुटेको छ । 

बिहीवार सहमति जुटेसँगै अब चलचित्र प्रदर्शन भइरहुन्जेल निर्माताले ५० प्रतिशत सेयर पाउने भएका छन् । 

निर्माता संघका अध्यक्ष नवल खड्काले ५० प्रतिशत सेयर बाँडफाँडको विषयमा सहमति जुटेको जानकारी दिए । 

दुवै संस्थाले संयुक्त विज्ञप्ति जारी गर्दै यसबारे जानकारी दिने तयारी रहेको खड्काले बताए । ​

यसअघि चलचित्र प्रदर्शनको पहिलो र दोस्रो हप्ता प्रदर्शक र निर्माताले ५०/५० प्रतिशत सेयर बाँडफाँड गर्थे । तर, तेस्रो हप्तादेखि निर्माताले जम्मा ३५ प्रतिशत र प्रदर्शकले ६५ प्रतिशत सेयर पाउँथे । 

शोज र सेयर बाँडफाँडमा आपत्ति जनाउँदै ‘दिमाग खराब’को टिमले चलचित्रको प्रदर्शन रोक्ने चेतावनी  दिएको थियो । चलचित्र प्रदर्शनभर ५० प्रतिशत सेयर नपाए चलचित्र हलबाट उतार्ने चेतावनी यसका निर्माता र निर्देशकले दिएका थिए । ​

शोजको विषयमा यसअघि नै सहमति जुटेपनि सेयर बाँडफाँडको विषयमा भने टुंगो लागेको थिएन । बिहीवार यसमा पनि सहमति जुटेसँगै शुक्रवारका लागि ‘दिमाग खराब’को शोज सार्वजनिक गरिएको छ ।

कात्तिक २४ गतेबाट प्रदर्शनमा आएको यो चलचित्र भोलि शुक्रवारबाट तेस्रो सातामा प्रवेश गर्दैछ ।