‘लोकान्तर राउण्ड अप’मा पाठकवृन्दलाई स्वागत छ । सधैँझैँ आज पनि हामी बितेको २४ घण्टाका मुख्यमुख्य घटनाक्रमसहित उपस्थित भएका छौँ–
प्रधानमन्त्री पुष्पकमल दाहाल प्रचण्डले आज जनता समाजवादी पार्टी (जसपा)लाई समेटेर मन्त्रिपरिषद् विस्तार गर्दैछन् ।
उनले आज मन्त्रिपरिषद् विस्तार गर्न लागेको प्रधानमन्त्रीको सचिवालयले जनाएको छ ।

जसपाबाट अध्यक्ष उपेन्द्र यादव उपप्रधान एवं स्वास्थ्य तथा जनसंख्यामन्त्री बन्नेछन् । यस्तै वन तथा वातावरण मन्त्रालयमा नवलकिशोर साह सुडी र स्वास्थ्य राज्यमन्त्रीको रूपमा दीपक कार्कीले नियुक्ति पाउने छन् ।
००००
नेपाली कांग्रेस राष्ट्रियसभा संसदीय दलको नेतामा कृष्णप्रसाद सिटौला मनोनीत भएका छन् । 
उनलाई शनिवार पार्टी सभापति शेरबहादुर देउवाले संसदीय दलको नेतामा मनोनयन गरेको कांग्रेस संसदीय दलको निजी सचिवालयले जनाएको छ ।
००००
संसद्को सार्वजनिक लेखा समितिको नेतृत्वमा नेपाली कांग्रेसले दाबी गरेको छ। 

पार्टी सभापति शेरबहादुर देउवानिवास बूढानीलकण्ठमा बसेको पदाधिकारी बैठकले सार्वजनिक लेखा समितिको नेतृत्व कांग्रेसले पाउनुपर्ने निष्कर्ष निकालेको हो । यसैबीच राष्ट्रियसभा अध्यक्ष पदमा पनि कांग्रेसले उम्मेदवारी दिने भएको छ । 
००००
प्रधानमन्त्री एवं नेकपा माओवादी केन्द्रको संसदीय दलका नेता पुष्पकमल दाहाल ‘प्रचण्ड’ले परिवर्तित राजनीतिक परिस्थितीका बारेमा संसदीय दललाई जानकारी गराएका छन् ।

संसदीय दलको कार्यालय सिंहदरबारमा आज बसेको बैठकमा प्रधानमन्त्री प्रचण्डले सरकारको समीकरण परिवर्तनका सम्बन्धमा प्रष्ट पारेको दलका मुख्य सचेतक हितराज पाण्डेले जानकारी दिए ।

बैठकमा प्रतिनिधिसभाको पछिल्लो अवस्थाबारे प्रतिनिधिसभाका मुख्य सचेतक पाण्डे र राष्ट्रियसभाका प्रमुख सचेतक गोपीबहादुर अछामीले बैठकलाई जानकारी गराएका थिए ।
००००
प्रधानमन्त्री पुष्पकमल दाहाल प्रचण्डले यही फागुन ३० गते विश्वासको मत लिने गरी तयारी गरेका छन् ।
नेपाली कांग्रेससँगको सत्ता समीकरण फेरेर नेकपा एमालेसहितको गठबन्धनमा सामेल भएपछि प्रधानमन्त्री प्रचण्डले विश्वासको मत लिन लागेका हुन् ।
००००
नागरिक उन्मुक्ति पार्टी (नाउपा)का संरक्षक रेशम चौधरीले संघ र प्रदेशमा सांसदहरूको संख्या घटाउनु पर्ने बताएका छन् ।

शनिवार साँझ बुटवलमा पत्रकारहरूसँग कुरा गर्दै नेता चौधरीले सांसद संख्या घटाउनुपर्ने प्रस्ताव अगाडि सारेका हुन् । साथै मन्त्री बनाउन पनि निश्चित मापदण्ड तोकिनुपर्ने उनले बताए ।
००००
नेपाल प्रहरीको पोलिग्राफ शाखामा हालसम्म दुई हजार सात सय ७८ मुद्दाका पाँच हजार चार सय १७ जनाको पोलिग्राफ परीक्षण गरिएको छ । स्थापना भएयता १० वर्षमा सो बराबर परीक्षण गरिएको हो ।
००००
नेपाली कांग्रेसका महामन्त्री विश्वप्रकाश शर्माले आफ्नो पार्टी सरकार भत्काउने चलखेलमा नलाग्ने स्पष्ट पारेका छन् ।
नेपाल शिक्षक सङ्घ बागमती प्रदेशको चौथो प्रतिनिधिसभाको शनिवार उद्घाटन गर्दै उनले कांग्रेस नयाँ सरकार बनाउनेतर्फ नलाग्ने स्पष्ट पारे ।
००००
पछिल्ला पाँच वर्षमा साइबर अपराधका घटना छ गुणा बढीले वृद्धि भएको पाइएको छ । 
नेपाल प्रहरी प्रधान कार्यालय, साइबर ब्युरोको तथ्याङ्कअनुसार आर्थिक वर्ष २०७६–७७ मा दुई हजार तीन सय एक निवेदन आएकामा चालु आवको फागुन २३ सम्म १२ हजार सात सय ८९ निवेदन आएका हुन् ।

 त्यस्तै आव २०७७–७८ मा तीन हजार नौ सय छ, आव २०७८–७९ मा चार हजार ६ सय ८६ र आव २०७९–८० मा नौ हजार १३ निवेदन परेको प्रहरी प्रधान कार्यालयले उल्लेख गरेको छ ।
००००
नेकपा एकीकृत समाजवादीका सम्मानित नेता झलनाथ खनालले हाम्रो देशको रणनीतिक महत्वका कारणले भूराजनीतिक शक्तिहरूको चासो दिन प्रतिदिन बढिरहेको टिप्पणी गरेका छन् । शनिबार बिहान सरकारलाई शुभकामना दिँदै खनालले नयाँ गठबन्धनको सरकार बनेकै दिनदेखि यसलाई असफल पार्न दक्षिणपन्थी शक्तिहरू चलखेल र षड्यन्त्रमा लागेको टिप्पणी गरेका हुन् ।