नयाँ वर्षको अवसर पारेर वैशाख १ गतेबाट ४ नेपाली फिल्म रिलिज हुँदै छन् । जसमध्ये अभिनेता दयाहाङ राईका दुई फिल्म छन् । रिलिजको तयारीमा रहेका ४ वटै फिल्म विविध कारणले चर्चामा छन् ।

यी मध्ये ‘जारी’ र ‘बुलाकी’को कथावस्तु समेत मिल्ने चर्चा यतिबेला फिल्मवृत्तमा छ । 

सार्वजनिक ट्रेलरबाट पनि त्यो कुरा आँकलन गर्न सकिन्छ । निर्देशक उपेन्द्र सुब्बाले लिम्बु समाजमा रहेको जारीको कथालाई ‘जारी’ फिल्मले उठाएको बताइसकेका छन् । यता, ‘बुलाकी’ भने कर्णालीको जारी प्रथाको कथामा निर्माण भएको फिल्म हो । उक्त फिल्मका निर्देशक लक्ष्मण सुनार दुई फिल्मको कथा संयोगवश मिल्न गएको देखिएको बताउँछन् ।

‘हामी कर्णालीको कल्चरमा छौँ । उहाँहरू लिम्बु कल्चरमा हुनुहुन्छ’ – निर्देशक सुनारले भने । 

उसो त ‘बुलाकी’ एकसाता अगाडि आउनेबारे पनि कुराकानी भएको थियो । यद्यपि, चैत २४ मा सुरक्षा पन्तको फिल्म ‘बहाव’ प्रदर्शनमा आउँदैछ । सुरक्षाको मुख्य भूमिका रहेका दुई फिल्म जुधाउँदा पनि असर हुने भएकाले ‘बुलाकी’ वैशाख १ मै ल्याउने निर्णयमा पुगेको निर्देशक सुनारको भनाई छ । 

उनले खुलेर नबोले पनि ‘बुलाकी’ पछाडि नहटनुको कारण भने ‘जारी’सँग कथावस्तु मिल्नु रहेको बुझिएको छ ।

‘‘जारी’भन्दा पछि आउँदा दर्शकले कथावस्तु उस्तै रहेछ भन्ने अवस्था आउँछ । त्यसैले ‘बुलाकी’ वैशाख १ मै रिलिज हुन लागेको हो’ – स्रोत भन्छ । 

‘जारी’मा दयाहाङ राई, मिरुना मगर, प्रेम सुब्बा, विजय बराल, रोयदीप श्रेष्ठ, रेखा लिम्बूलगायतको अभिनय छ ।

त्यस्तै, ‘बुलाकी’मा सुरक्षा पन्त, नरेन खड्का, विराज विष्ट, सरस्वती खत्री, लक्ष्मी गिरी, प्रकाश कंडेल, सुशील पोखरेल, रमेश बुढाथोकीलगायतको अभिनय छ ।

‘जारी’को ट्रेलर :

‘बुलाकी’को ट्रेलर :