नक्कली शरणार्थी प्रकरणमा जाहेरवाला नै प्रतिवादी रहेको विषय मंगलवार बहसका क्रममा उठेको छ ।

काठमाडौं जिल्ला अदालतमा जाहेरवाला रामकुमार रेग्मीसहित १५ जनाको तर्फबाट बहस गरेका दीपकराज रेग्मीले जाहेरवाला गजेन्द्र बुढाथोकीका सम्बन्धमा जिल्ला अदालत दाङमा विचाराधीन मुद्दाको मिसिल प्रमाणका रूपमा झिकाउन माग गरेका हुन् ।

'२०७९ फागुन ३० मा दर्ता भएको उक्त मुद्दामा साक्षी प्रमाण बुझ्ने आदेश भएको छ । प्रमाणका रूपमा त्यसको मिसिल झिकाइपाऊँ,' रेग्मीले भनेका थिए ।

नक्कली शरणार्थी प्रकरणमा जाहेरवाला रहेका बुढाथोकी विरुद्ध यही प्रकरणमा ठगी मुद्दा रहेको यसअघि नै सार्वजनिक भएको थियो ।

जिल्ला प्रहरी कार्यालय दाङले फरार अभियुक्तका रूपमा खोजी गरिरहे पनि बुढाथोकी पक्राउ परेका छैनन् ।