मन्त्रिपरिषद्का पूर्वअध्यक्ष एवं पूर्वप्रधानन्यायाधीश खिलराज रेग्मीले स्थायित्व र समृद्धिको यात्रा धरमराउँदो अवस्थामा रहेको टिप्पणी गरेका छन् । नयाँ वर्ष २०८१ को अवसरमा आज शुभकामना सन्देश जारी गर्दै रेग्मीले संविधान निर्माणपछि दुईपटक आम निर्वाचन भइसक्दा पनि मुलुकले स्थायित्व प्राप्त गर्न नसकेको टिप्पणी गरेका हुन् ।

केन्द्रमा सत्ता समीकरण फेरिँदा प्रदेश सरकारहरू तासका घरझैँ ढलिरहेको टिप्पणी गर्दै स्थायित्व र समृद्धि कसरी सम्भव हुन्छ भन्दै उनले प्रश्न गरेका छन् । ‘केन्द्रमा सत्ता समीकरण फेरिँदा प्रदेश सरकारहरू तासका घरझैँ ढलिरहेका छन् । स्थायित्व र समृद्धि कसरी ? के सोंचे मैले के हुँदैछ अहिले भन्नेजस्तो भएको छ,’ उनले जारी गरेको सन्देशमा भनिएको छ, ‘समय र श्रम राजनीति व्यवस्थापनमै बढी खर्च गर्नुपर्दा अन्य गतिविधि सुस्त र कामचलाउ प्रकृतिका हुने नै भए ।’

अब परिवर्तनकारी शक्तिहरूले गम्भीर विमर्श गर्दै आगामी लक्षित मार्ग तय गर्नु जरुरी रहेको उनको भनाइ छ । ‘परिवर्तनकारी शक्तिहरूसमेत सबैले गम्भीर बहस र विमर्श गर्दै आगामी लक्षित मार्ग तय गर्नु जरुरी भइसकेको छ । अब पनि नभए कहिले हुने ? भन्ने प्रश्न गम्भीर बनेर सबैका सामु खडा भएको छ,’ सन्देशमा भनिएको छ । 

उनले देश-विदेशमा रहेका सम्पूर्ण नेपालीलाई शुभकामना दिँदै नव वर्षले शान्ति, सद्भाव र एकता कायम गर्दै स्थिरता र समृद्धिको यात्रामा लाग्न प्रेरणा प्राप्त होस् भन्ने कामना गरेका छन् ।